Haship kingunipilorisinnaasai annertunerusumik paasisitsiniutigineqalerunarpoq
Ikiaroornartoq hash pillugu Inatsisartuni ullumi oqallittoqarmat kingunipilui pillugit inuusuttunut annertunerusumik paasisitsiniaasoqartariaqartoq isumaqatigiissutigineqarpoq.
Ikiaroornartup haship nunatsinni annertuumik atugaanera, eqqussugaanera, saqqummilaartuunera nalinginnaaleraluttuinnarneralu ernumanartortaqartoq partiit Inatsisartuniittut tamarmik oqariartuutigaat, atuinerullu kingunipilorisinnaasai annertunerusumik inuusuttunut paasisitsiniutigineqartariaqartoq oqariartuutigineqarluni.
Ikiaroornartup kingunipiluinik atuarfiit ilinniarfiillu aqqutigalugit paasisitsiniaanerup sakkortusarneqarnissaanik Inuit Ataqatigiit sinnerlugit Inatsisartuni ilaasortap Juliane Henningsenip siunnersuutaa Inatsisartuni ullumi siullermeerneqarpoq, partiinillu tamanit tapersersorneqarluni aappassaaneerneqannginnerminilu Peqqissutsimut Ataatsimiititaliamit suliarineqarnissaa inassutigineqarluni.
Innuttaasut hashimik atuinerat nuna tamakkerlugu misissuisoqarnissaanik, Demokraatit sinnerlugit Inatsisartuni ilaasortap Astrid Fleischer Rexip siunnersuutaa Siumukkut eqqaassanngikkaanni amerlanerussuteqartunit aamma taperserneqarpoq.
- Pinaveersaartitsineq katsorsaanerlu tunngavissaqarluartumik ingerlanneqassappata, nuna tamakkerlugu hashimik atuineq misissuiffigineqartariaqarpoq, Demokraatit tunngavilersuutiminni allapput.
Misissuisimanerit naammattut innersuussutigalugit Siumukkut Demokraatit siunnersuutaat ilalinngilaat.
- Nalunngikkaluarlugu ikiaroornartoq nunatsinni inerteqqutaasoq, innuttaasunit amerlasuunit nipaarsaarussaasoq nalunngilarput, oqaatiginninnissamut qununeq sioooraneq innuttaasut akornanni piuvoq, Siumut sinnerlugu oqaaseqartoq Doris Jakobsen oqarpoq.
Siunnersuuteqartut oqaaseqartinniaraluaratsigit iluatsinngilagut.