Hashimik anngiortumik eqqussuisimasoq eqqartuunneqartoq

Pineqaatissinneqarsimasunut inissiisarfimmiittussanngortitaanerata saniatigut iluanaarutigisimasai 2,7 millionit koruuniusut aamma ikiaroornartoq hash 1 kiilu 25 grammi arsaarinnissutigineqassasut Nunatta Eqaartuussiviata aamma aalajangiiffigaa. Tamatuma saniatigut eqqartuussivimmut suliassanngortitsinermi aningaasartuutit angutip aamma akilertussanngorpai.

Angut nalaatsornerinnakkut paasineqarpoq.

Akileraartarnermut qullersaqarfimmiut qimminik isumaginnittuusut Nuummi umiarsualivimmi qimmiminnik siorna sungiusaapput. Sungiusarnerup nalaani qimmit ilaata ikiaroornartoq hash naamalermagu politiit aggersarneqarput.

Angutip ukiut sisamat sinnillit ingerlanerini hashimik anngiortumik eqqussisarsimanini tuniniaasarninilu eqqartuussivimmi nassuerutigai, Nunattalu Eqqartuussivianit oqaatigineqarluni piffissami pineqartumi kiilut qulingiluat sinnerlugit tuniniarsimassagai.

- Ukiuni pingasuni pineqaatissinneqarsimasunut inissiisarfimmiittussanngortitsineq, sakkortunermik pineqaatissiinerit ilagaat, unnerluutiginnittunit Henrik Prien-Larsen tusagassiuutinut nalunaarummi allappoq.

- Tamatumunnga patsisaavoq, anngiortumik eqqussuinerup tuniniaanerullu piffissami sivisunerusumi pisimanera, aamma ikiaroornartoq annertooq pineqarmat, eqqartuussaasullu tamanna aningaasatigut iluanaarutigisimammagu, pinerlunniarnertullu aaqqissuussaasutut isikkoqarmat.

Eqqartuussisoqarfimmi Sermersuumi siusinnerusukkut eqqartuussinerup inernera, Nunatta Eqqartuussiviani ullumi atuuttussanngortinneqarpoq.