Hash pillugu suliaq oqaluttuarisaanermi malunnaatilik ullumi naammassineqassaaq
Inuit arfineq marluk hashimik annertuumik eqqussisimasutut Eqqartuussisoqarfik Sermersuumi siorna aggustimi sivisuumik tigummisassanngorlugit pineqaatissinneqarput.
Angutit arfinillit hashimik 60 kg ataannagit annertussusilimmik Danmarkimiit eqqusseqataasimasutut arnarlu ataaseq 30 kg ataannagit eqqusseqaasimasutut eqqartuuneqarput
Angutit tallimat ukiuni tallimani pineqaatissinneqarsimasunut inissiisarfimmiittussanngortinneqarput, angullu ataseq 29-nik ukiulik ukiuni tallimani qaammatinilu arfineq pingasuni, arnaq ukiuni pingasuni qaammatinilu qulingiluani.
AAMMA ATUARUK Suliareqqitassanngortitaq aallartilluartoq
Pineqaatissinneqartut arfineq marluusut tamarmik pisuunermik apeqqutip suliareqqitassanngortinneqarnissaanik kissaateqarsimapput, taamaattumillu suliaq eqqartuussisoqarfimmi aasaq manna ingerlanneqaqqippoq.
Suliaq haship annertussusaa unnerluussallu arfineq marlunnik amerlassuseqarnerat pissutigalugit assut maluginiarneqarpoq.
Eqqartuussaasut taakku arfineq marluk politiit Nuummi ulloq juulip 24-ani 2017 annertuumik suliniarneranni tigusarineqarnermi kingorna ukiut marluk sinnerlugit tigummigallarneqareerput.
