Hash-eerniat pineqaatissinneqarput

Arnaq 21-inik ukiulik, hash-imik eqqussuisimasutut pisuutinneqarluni, ukiuni marlunni pineqaatissinneqarsimasut inissiisarfianniittussanngortinneqarpoq. Arnap inuusuttup pineqaatissinneqarnermi saniatigut, aningaasat 190.000 koruunit arsaarinnissutigineqarput.

Hash-imik anngiortumik eqqussuinersuarmut atatillugu suliami, arnaq inuusuttoq tigusarineqarsimavoq, allallu pingasut aamma suliamut tassunga atatillugu pineqaatissinneqarput.

Arnaq inuusuttoq Qaqortup eqqartuussiviani eqqartuunneqarpoq, hash-imillu katillugu 7 kilo-mik tuniniaasimasutut pineqaatissinneqarluni. Arnap pineqaatissinneqarnini naammagiinnassanerlugu imaluunniit nunatta eqqaartuussivianut ingerlateqqissanerlugu, sapaatit akunneri marluk eqqarsaatigissallugu periarfissalerneqarpoq. Taama aviisi AG allaaserinnippoq.

Pineqaatissinneqartut allat tassaapput arnaq, angutillu marluk, taakkualu Aasiaat kredsret-ani eqqartuunneqarput.

Angutit marluk, qaammatini tallimani anstaltimiittussanngortinneqarput, taassumalu saniatigut arsaarinnissutigineqarput 60.000 koruunit.

Arnaq qaammatini qulini pineqaatissinneqarsimasut inissiissarfianiittussanngortinneqarpoq, aningaasallu 315.000 koruunit arsaarinnissutigineqarlutik.

Inuit allat arfinillit suliamut tassunga attuumassuteqartut, arnat marluk angutillu sisamat, pineqaatissinneqarnissaminnut suli utaqqipput.