Hash dopingilu pillugit eqqartuussut ingerlateqqippaat

Angutit pingasut hashimik dopingimillu anngiortumik eqqussuisimasutut eqqartuussaanerat politiit ingerlateqqitassanngortippaat.
januaarip 06-at 2012 04:58

Politiit aalajangerput Ilulissat eqqartuussiviani aalajangerneq Nunatta Eqqartuussivianut ingerlateqqinniarlugu. Angutit marluk 26-nik ukiullit qaammatini 14-ini pinerluuteqarsimasunut inissiisarfimmiittussanngorput allalu suleqataasimasutut qaammatini aqqaneq marlunni mattusimaneqartussanngorluni.

Taakku saniatigut pinerlunnermi tassani suleqataasimasoq Nunatta Eqqartuussiviani eqqartuunneqarnermini qaammatini aqqaneq marlunni pinerluuteqarsimasunut inissiisarfimmiittussanngorpoq. Taanna pisuutinneqarpoq Danmarkimut hashimik pisiniartuusarsimasutut.

Maanna politiit piumasarilerpaat pinerloqataasut pingasut Nunatta Eqqartuussiviani aamma eqqartuunneqassasut

- Ingerlatitseqqiinermut tunngaviuvoq ikiaroornartumik eqquissuinermut ikiuussimasoq Nunatta Eqqartuussivianit qaammatini aqqaneq marlunni pinerluuteqarsimasunut inissiisarfimmiittussanngorlugu eqqartuunneqarsimammat. Angutit pingasut Ilulissat Eqqartuussiviani eqqartuunneqartut, isumarput malillugu tassaapput ikiaroornartumik eqquissuinermi aqutsisuusimasut, politimesterimut tullersortaagallartoq Helle Lykke Olesen Qanoruumut oqarpoq.

- Taama annertutigisumik ikiaroornartumik eqquissuinermut tunngasumik suliamik ingerlasoqartillugu, isumaqarpugut Nunatta Eqqartuussivia suliassap ilaanut aalajangiisimappat, aamma angutit pingasut pineqartut pillugit aalajangiisaqariartoq. Isumaqarpugummi Ilulissat Eqqartuussiviani angutit pineqartut eqqartuunneqarneranni ikiaroornartulerinermi suliaqarsimasut piliaat isiginiarneqarsimanngitsut, Helle Lykke Olesen oqarpoq.

Angutit Ilulissani eqqartuunneqartut pinerluuteqarsimasunut inissiisarfimmiittussanngortinneqarput qaammatini 14-ni pingajuallu qaammatini aqqaneq marlunni. Aamma aningaasat 513.000 koruunit arsaarinnissutigineqarpoq. Aamma dopingimut atortut anngiortumik eqqunneqarsimapput dopingerutit 65-it aamma arsaarinnissutigineqarmata. Taakku saniatigut hashi 528 gram aamma arsaarinnissutigineqarpoq.

Nunatta Eqqartuussiviani suli aalajangertoqanngilaq qaqugu eqqartuussineq pissanersoq.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.

Aamma atuaruk