Hardenberg: Pitsaasuunngilaq

Carsten Frank Hansenip ulluni marluinnarni sulereerluni Vittus Qujaukitsup naalakkersuisoqarfiani atorfimminit tunuariasaarnera tupaallaatigineqaqaaq, tunuarnerali pinerluttuliorsimaneranik pasillerneqarsimanera pissutaavoq. Sulisitsisorisimasaminut koruunit millionit pingasorartaanik peqquserluuteqarsimasutut unnerluutigineqarpoq.

-Carsten Frank Hansenip naalakkersuisoqarfimmi pisortatut atorfinitsinneqannginnerani paasissutissat attuumassutillit tamaasa tassannga pissarsiarisimanagit paasivarput. Suliarput pitsaasimanngilaq, tamannalu aaqqinniartariaqassavarput piffissamilu aggersumi annertuumik oqallisigalutigu, naalakkersuisoqarfimmi pisortaq Svend Hardenberg, atorfinitsitsinermut ataatsimiititaliami siulittaasuusimasoq knr.gl-imut oqarpoq.

Carsten Frank Hansen suliarisimasai pillugit apeqquteqartoqarsimagaluarpoq. Siunnersorti avataaneersoq Hansenip sulisitsisorisimasaanit oqaaseqaatinik piniarsimavoq, atorfinitsinniarneqartussarli pillugu apeqquserneqarsinnaasunik nassaartoqarani.

-Aningaaserivimmit atorfeqarfigisimasaanit aammalu kingullermik atorfeqarfigisaanit Greentopimit oqaaseqaatinik piniartoqarsimavoq, paasissutissanilli aarlerinarsinnaasunik pissarsiaqanngilagut. Tamanna ajuusaarnartittupilussuuara, tassami paasissutissat Berlingske Businessip pissarsiarisinnaasai uagut pissarsiarisinnaasimanngilagut, Hardenberg oqarpoq.

Carsten Frank Hansenip tunuarneratigut aningaasaqarnermut naalakkersuisoqarfik kingumut aalajangersimasumik aqutsisoqarunnaarpoq, Svend Hardenbergilli taartaasup Peter Hansenip piginnaasai toqqissimanartippai.

-Taartaasussamik aalajangersimasumik nassaarnissatta tungaanut pikkorissumik sulisussaqarpugut. Peter Hansen atorfimmut piukkunnartupilussuuvoq, aamma maani naalakkersuisoqarfitsinni tatigilluinnarparput. Atorfik kingullermik inuttaarummat qinnuteqanngilaq, kisianni piukkunnaraluaqaaq, Svend Hardenberg oqarpoq.