Hans Jukku quiasaarilerpoq

Atuagassiaq sapaatip akunneranut saqqummersartoq Tiu Tiu, kulturip illorsua Katuaq aamma Tumit Productions, suleqatigiillutik torrutiinnarlugu kalaallisut quiasaarinissamik aaqqissuisuupput.

Kalaallit inuiaapput illarumatuut aammalu quiasaarutit oqaluttuallu quianartut ingerlaartuartuupput inuillu ilanngui tusaamasat kiinaannik ilaarsillaqqilluinnartuupput. Ilami kiap tusarsimanngilaa Hans Jukku Noahsen-ip nipinik ilaarsilluni quiasaarisarnera.

Nipilersortartullumi aamma Miké Fencker Thomsen aamma John G. Sandgreen illartitsillaqissut ilagaat. Maanna tassa Katuami issiavimmut maavaartumut ingiimiataaginnarluni taakkuninnga illaatiginnittoqarsinnaalerpoq. Tamanna pissaaq sisamanngorneq oktobarip 27-at aamma sisamanngorneq novembarip pingajuat.

- Killissarititanik qaangiisutut oqaatigineqarsinnaalluarpugut tassami aliikkusersuinermi inuit ilisimarneqartut quinartunngornissaat tunuarsimaarfigineqassanngimmat, Tiu Tiu, Katuaq aamma Tumit Productions nalunaarput.

- Kalaallit attortiasuupput inuillu ilaannik quisuutiginninneq ajuallaatigineqarsinnaasarluni. Assersuutigalugumi Aleqa Hammond arnanut atisaarniarfimmiittoq quinartunngorukku qularinngilara ajuallalluni kamassasoq. Taavalu Palle Christiansen GrønlandsBANKEN-imi kontoqartoq quiasaarutigigukku qularnanngilaq Arto.dk-mi ikinngutimisut piissagaanga. Illuanilli Atassutikkormiut Siumukkormiullu ikinngutitaarinialissagaluarpaannga. Soorunami quisaarutit taakku ilumoortumik tunngaveqanngillat kisiannili tissinartuullutik. Inuit taakku ilisimaneqarluartuupput sulilu ukiorpassuarni taamaattuartussaagunarlutik. Taamaappat inuiaqatigiinni sooq sapissavarput tamakku quinartunngortinnissaat soorlu nunarsuarmi nutaaliaasumi tamanna atorneqareersoq, aaqqissuisuniit Jens-Jakob Lennert- Sandgreen nalunaarpoq.

Aliikkusersuineq Tumit Productions-imit filmiliarineqassaaq pilersaarutaavorlu ukiortaariitsiarnerani saqqummersinnissaa.

Aaqqissuisut ilanngullugu nalunaarutigaat aliikkusersuineq iluatsilluassappat siunissami taamatut aaqqissueqqikkusussinnaallutik.