Hans Holm, Hansinnguaq 80-inik ukioqarluni toqukkut qimaguppoq

Kalaallit Nunaata Radiuani radiukkut aallakaatitassiortutoqqat amerlajunnaartut ilaat, Hans Holm, arfininngormat februaarip ulluisa naggataanni toquvoq, 80-inik ukioqaleqqammerluni.
Allattoq Lotte Holm
marsip 02-at 2009 13:21

Hansinnguaq Nuummi 1929-mi inunngorpoq, ilaatigut

Nuummi atuarfiit ilaanni timelærer¬itut sulereerluni, 1970-ikkunni radiumi pingaartumik atuffassilluni aallakaatitsisaleqqaarluni. 1975-imi KNR-imi aalajangersumik atorfeqalerpoq, 1997-imilu soraarninngornissi tikillugu tassani sulilluni.

Hansinnguup kalaallisut oqaatsitsinnik atuilluarneq radiukkut aallakaatitsisarnermini pingaartitaraa. Angalalluni aallakaatitassiarpassuarmini sumiiffinni nunat aqqi saqqummiussortittarpai, taamalu sinerissap ilaa ilisimaneqarnerulersillugu.

Hans Holmip timersorneq tamatumanilu peqatigiiffeqarneq aamma aallutarisimavai, timersoqatigiiffiillu kattuffianni siulersuisunut ilaasortaasimalluni. Timersortartutut ilisimaneqaatiginerugunarpaa sisorarluni tinngallattaartarnini. Aamma nammineq aallaaniarluni angalaarnermik nuannarisaqarluartuusimavoq.

Hansinnguup qimatarai nulii Karen, aamma siullermik nuliarisimasanilu qitornatik tallimat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq