Hans Hedtoft nunatsinni Danmarkimilu eqqaaniarneqassaaq
Umiarsuarmi inuttaasut 40-t, ilaasullu inersimasut meeqqallu 55-it, tamarmik ajunaarsimasutut isigineqalernerannik radioavisikkut pisortat februaarip ulluisa arfernanni 1959-imi nalunaaruteqarput.
Umiarsuup Hans Hedtoftip nunatsinnukarngaarluni utimut Danmarkiliartilluni umiunerani qimataasut Københavnimi Illu Atlantikumi eqqaassutissap eqqaani ullumi katersuutissapput, nunatsinnilu arlalinnik eqqaaniaasoqassaaq.
Nanortalimmi nalunaaqutaq ataatsimut kransiliissaaq Emilie Stach. Emilie Stachip angutaa matros Oluf Thøgersen umioqataasimavoq. Tussiaqatigiittoqassaaq marlunullu qiteqquppat Qujanartip illuani innuttaasunut tamanut kaffillertoqassalluni, assinik allagaatinillu Hans Hedtoftimut tunngasunik saqqummersitsiviusussamik.
Nuummi Umiartortut angerlarsimaffiata silataani nalunaaqutaq marlunut kransiliineqassaaq, kinguninngualu nalunaaqutaq pingasunut Hans Egedep oqaluffiani eqqaaniaalluni naalagiaqatigiittoqassalluni, kingorna ilagiit ataatsimiittarfianni kaffisoqatigiinneqassalluni.
Qaqortumi Hans Hedtoftip umiutinnani illoqarfinni kingullertut najugaani nalunaaqutaq ataatsiniit naalagiartoqassaaq, kingorna kaffisoqatigiinneqassalluni. Hans Hedtofti pillugu aviisini allaaserisat assiisivinnut ikkussukkat Katersugaasivimmi saqqummersinneqarnerat aamma ullumi ammarneqassaaq.
Hans Hedtoftip annanniutaa Qaqortumi oqaluffimmiittoq Kommune Kujallermit Namminersornerullutillu Oqartussanit aallartitanit aamma kransilerneqassaaq.
Umiarsuaq, qajannaatsorsuartut taasaq "Hans Hedtoft", ukiut 50-erpiaat matuma siornagut 95-inik issimasoqarluni Nunap Isua qaangereerlugu umiuvoq.
Radiokkut aallakaatitassiaq 1999-imi immiussaq ullaap tungaagut nalunaaqutaq qulinut aallakaatinneqassaaq.