Hans Grønvoldip Qilakitsormiut nassaarai: Iliveq nakkutigaarput
Uummannarmiu, Hans Grønvold 19-inik ukioqarluni aqisserniartarnerpassuarmisulli aqissernerniarpoq.
Qaarsummilu ujaqqat manissut allaanerusut maluginialerpai.
- Ujaqqanit tigusivunga, ujaqqallu ataanni inoqartoq paasivara. Misissorluariarakku paarilluagaalluartut paasivara. Asiusimanatillu nungullarsimanngillat, Hans Grønvold Uummannamit oqarasuaatikkut oqarpoq.
Taassuma Qilakitsormiunik 1400-ikkunneersunik arfineq-pingasunik nassaarneranit ukiut 50-it qaangiupput, taakkulu nunatsinni ullumikkut tusaamasaanerpaapput. Aminik atikkersorsimasut, isaat imaqanngitsut kakiornerillu nungulersimasut Nunatta Katersugaasiviani takuneqarsinnaapput.
Itsarnisarsiuulli timinik paniinnarnikunik naliliinissaata tungaanut Hans Grønvold qatanngutinilu ilivermik ukiuni arfinilinni paarseqqaarput.
- Isertuullugit paarivagut, taavalu ujaqqat allangnunnginnersut nakkutigivagut, silaannarmi taamaatiinnarusupparput, Hans Grønvold oqarpoq.
Tamanna aalajangerneq eqqortuusoq paasineqarpoq.
Ukiut inuuffiit qaffasissoq kakiornerillu
Timimmi paniinnarnikut paarilluakkat siuaagut Thulekulturilu pillugit paasissutissanik pingaaruteqartunik pissarsiffiupput.
Tamatuma saniaitigut timit paniinnarnikut nunatsinni Issittumilu ukiut inuuffiusut Skandinaviami ukiunit inuuffiusunit amerlanerusut ilaatigut paasineqarpoq.
Timit paniinnarnikut ilisimatusartunit ilinniartunillu ullumikkut misissorneqakkajupput.
Tamanna Nunatta Katersugaasiviani katersugaatilerisup oqaatigaa.
- Arnat ilaat kiinnamikkut kakiorneqartut paasineqarpoq, aamma kakiornerit immikkut ittumik qanoq suliarineqarsimanerannut paasisaqartoqarpoq, aamma titarnerit qanoq ittut kakiorneqarsimanersut. Taamaammat tamanna inuusuttunut kalaallit naggueqatigiittut inuttut kinaassusaannut pingaaruteqarluinnarpoq, kakiornerit ullumikkut atorneqaqqittalerput, Hans Lange oqarpoq.
Toqqorsiviit pitsaanerusut
Timinit paniinnarnikunit sisamat tassa arnat pingasut meeraararlu arfinilinnik qaammatilik ullumikkut Nuummi Nunatta Katersugaasivianiipput, sinneri sisamat Københavnimi Panum Instituttimi toqqorsimatinneqarput.
Naak Nunatta Katersugaasiviata timit paniinnarnikut utertinneqarnissaat kissaatigigaluaraa timinik panernikunik toqqorsimatitsinissamut allanik nunatta piginngisaanik pisariaqartitsisoqarpoq.
- Politikkikkut iliuuseqartoqartariaqarpoq. Politikerit nunatsinnut utertitserusukkunik nunatsinni toqqorsiviusinnaasunut nutaanut aningaasaliisariaqarput, Hans Lange oqarpoq.