Hans Enoksenip tunuarnissani piareersimaffigaa
Siumup siulittaasua Hans Enoksen 1413-inik taaguunneqarluni Aleqa Hammondimut ajorsarpoq, Aleqa Hammond 1488-nik taaguunneqarmat.
- Qularnanngilaq akerleriissutissaqarnavianngilagut, qangalili eqqaallattaareerpara arlaatigut nikittoqassappat uanga nunaqarfinnguatsinnut Itillimut eqqissillunga ingerlasariaqarlunga.
Kinguneqartitsinissat tunuarsimaarfiginngilat?
- Uannut ajornartorsiutaanavianngilaq aamma qinersisartut isummernerat ataqqissavara.
Illit siulittaasutut nammineq tunuarusuppit imaluunniit siulersuisut aalajangernissaat utaqqeqqaarusuppiuk?
- Partiip angusai qiviassagaanni piffissami sivisuumi persanneqaraluaqaluta qinersisartugut qujaffigerusuppakka taama aalajaatsigisumik inissisimammata, taava siulersuisuunerni oqaloqatigiissutigissavarput qanoq ingerlariaqqissanerluta.
Siumup partiiata politikkia sutigut allannguuteqassava?
- Soorunami pikkorluffigilaarsimavarput inunnut qaninnerusumik, kisianni aamma allannguinerit annertoorujussuit siuttuuffigisakka annertoorujussuarmik upissunneqaatigisarsimavagut, taakkua soorunami akeqarput, kisianni uanga nuannaarutigaara allannguinermik, aatsaat taama nunatsinni oqaluttuarisaanermi annertutigisumik, siuttuullunga naammassigakkit, taamaalilluni aamma uannut politikkikkut akeqarpoq. Taanna ajuusaarnanngilaq, uannut nuannernerpaajuvoq tulluusimaarnarnerpaajullunilu inuiaqatigiit alloriarfissaanut piseriarlugit massakkut siuttuuffik allap tigusussanngormagu, Siumumi siulittaasoq Hans Enoksen taama oqarpoq.
