Hans Enoksenip Tasiilami inuusuttut ikiorniarpai
Ataatsimiinnermi ajornartorsiutit assigiinngitsut pillugit minnerunngitsumillu Tasiilami sapaatip-akunnerata naanerini kingullerni imminut toqoriarnerit qulit sinneqartut eqqartorneqassapput.
Suleqatigiissitamik Namminersornerullutik Oqartussat ataaniittussamik pilersitsisoqarnissaa Naalakkersuisut siulittaasuata piaartumik pissasoq aamma kissaatigaa. Suleqatigiissitami kalluarneqartussat Tasiilami innuttaasut, kommuni allallu tamaasa suleqatigerusunneqarput.
- Oqartoqarniassagaluarpoq tupannartumik aatsaat pisoqaraangat Naalakkersuisut iliuuseqarnialersartut. Aap, eqqaamasariaqarparput sumiiffinni assigiinngitsuni inuit inuunerminnik ajunngitsumik ingerlatsisut akuliuffigissallugit pissutissaqarneq ajoratta. Uanili pisuni ilungersunartuni allaat inuuneq soqutaanngitsutut isigineqarsimassappat, taava pissutissaqarpugut akuliunnissatsinnut, Naalakkersuisut siulittaasuat Hans Enoksen oqarpoq.