Hans Enoksenip Nunavummi tikeraarnissaralua kinguartinneqarpoq

Naalakkersuisut siulittaasuat Hans Enoksen pisortatigoortumik Iqalunnut tikeraartoq ullaa´tungaa radioaviisimi oqaluttuaraarput, tamannali kinguartinneqarpoq.
Allattoq Elisa Isaksen
juulip 14-at 2008 10:35

Namminersornerullutik Oqartussaniit paasitinneqarpugut naalakkersuisut siulittaasuata Hans Enoksenip pisortatigoortumik juulip ulluisa aqqaneq aappaanniit 15-ata tungaanut tikeraarnissaraluara arfininngormat Nuummi pujorpallaarnera pissutigalugu Air Nunavummit timmisartoq attartugaq Nuummut missinnaasimanngimmat tikeraarnissaraluaq kinguartinneqartoq.

Naalakkersuisut siulittaasuisa Nunavumeersup Paul Okalip Kalaallit Nunaanneersullu Hans Enoksenip ukiumoortumik ataatsimiinnissaraluat ukioq manna kingusinnerusumut kinguartinneqarpoq.

Nunavummi tikeraarnermi naalakkersuisunut ilaasortaq Aleqa Hammond angalaqataasussaangaluarpoq. Ataatsimiinnermi sammisat assigiinngitsut eqqartorneqartussaangaluarput, ilaatigut aamma eqqartorneqartussaagaluarpoq silap pissusaata allanngoriartornera aamma Europamut puisip amiinik eqqusseqqusiunnaarnissamik aarleqquteqarneq.

Namminersornerullutik Oqartussanit paasitinneqarpugut Hans Enoksenip Paul Okaliullu ataatsimiinnissaat kinguartinneqartoq, ukiap ingerlanerani piumaartoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq