Hans Enoksenip namminersulernissaq kinguarsartussanngorpaa
- Naalakkersuisut siulittaasuata Hans Enoksenip assigiimmik akeqartitseqqilerniarnera namminiilivinnissamut kinguariartitsissaaq, taama oqarpoq parteeqataa Ole Aggo Markussen.
Taanna Namminersorneq pillugu Isumalioqatigiissitami siusinnerusukkut ilaasortaavoq, taamalu assigiimmik akeqartitsiunnaarnissap isumaliutissiissutigineqarnerata 2003-mi inaarneqarnera peqataaffigalugu.
Assigiimmik akeqartitsiunnaarnermik aalajangernermut ilaatigut siunertarineqarpoq Kalaallit Nunaat namminersuleruni aningaasaqarnermigut imminut napatissinnaaniassammat.
Ole Aggo Markussen ima nassuiaavoq.
- Isumaqarpunga Namminersorneq pillugu isumalioqatigiissitamut kalaallit ingerlassimasaannut Hans Enoksenip taama allannguiniarnera naleqquttuunngitsoq, tamannalu killormut aallariarnerussaaq, Ole Aggo Markussen oqarpoq.
Taanna isumaqarpoq Hans Enoksenip taama anguniagaqalernera tapiissutit piiarneqarnissaannut anguniagarineqartumut unititsinerulluniluunniit kinguarsaanerussasoq.
Ole Aggo Markussen aperaarput Hans Enoksenip tunngavilersuutigisimagaa taama aaqqiinerup akisuallaarnera pissutigalugu allanngorteqqinneqartariaqarnera. Ilumullu tamanna akisuallaarsimanersoq aperaarput.
- Apeqqutaavoq assigiimmik akeqartussaatitaaneq qanoq paasineqarnersoq. Paasiuminaatsittarpara politikkerit isumaqaraangata kiassarnermut imermullu tamavitta assigeeqqissaamik atugaqassasugut, Ole Aggo Markussen oqarpoq.
Taassuma taama oqarnerminut tunngavilersuutigaa, inuuniarnermut toqqammaviusut eqqarsaatigineqarsimassappata taava naatsorsuutigigini innuttaasut illoqarnermikkut akiliutaat sumiluunniit najugaqaraluarunik aamma assigeeqqissaamik akilerneqartalernissaat.
- Inigisamut akiliisarneq assigiinnarpaa, namminermi aalajangertarparput sumi najugaqarnissarput, Ole Aggo Markussen oqarpoq.
Taanna nangilluni qalleqqissaavoq kalaallit inuiattut namminersulerniarnerat taamaaliornikkut kinguarsarneqassasoq.
- Namminersulernissaq isumaqarpoq tapiissutinik allaninngaanniit pisarunnaarneq. Taassumalu malitsigisariaqarpaa tamatta sapinngisamik nammassinnaasarput naapertorlugu ingerlanissarput, taama oqarpoq Namminersorneq pillugu Isumalioqatigiissitami siusinnerusukkut ilaasortaasoq Ole Aggo Markussen.
