Hans Enoksenimut apeqquteqaateqarpoq

Naak naalakkersuisut siulittaasuata Hans Enoksenip Kalaallit Nunaanni isumaginninnikkut ajornartorsiutinut iliuuseqarniarluni ministeriunermik Anders Fogh Rasmussenimik januaarip qulinganni isumaqatigiissuteqarneraraluartoq, suli isumaqatigiissummik saqqummersoqanngilaq.
Allattoq Mads Lynge
januaarip 23-at 2008 14:13

Tamanna paasiniarlugu Inatsisartunut ilaasortaq Asii Chemnitz Narup naalakkersuisut siulittaasuannut § 36 tunngavigalugu apeqquteqaateqarpoq.

- Tassa naalakkersuisutigoortumik isumaqatigiissutit pingaaruteqarmata, qanorpiaq isumaqatigiissut imaqarnersoq paasissallugu qilanaarisimavara, kisianni tassa ullut massakkut 13-issaat ingerlalerput suli tamanut saqqummiunneqarnani, erinigilerlugu allakkatigut ujartortariaqartariaqarlugu isumaqarsimavunga, aammalu miserratigissanngilara, statsministeriaqarfimmi paasiniaanermi nalornissutigimmassuk, ilumut isumaqatigiissuteqartoqarnersoq uanga aamma nalornilerpunga, tassa uanga ujartorpara piviusut suunukua, isumaqatigiissullu qanorpiaq imaqarnersoq, Asii Chemnitz Narup aperivoq.

Naalakkersuisut siulittaasuat Hans Enoksen isumaqatigiissut sumik imaqarnersoq aperigatsinni akivoq, Kalaallit Nunaanni isumaginninnernut naalakkersuisoq aamma Danmarkimi isumaginninnermut ministeri immikkuualuttunik aalajangersaassasut, namminnerlu taamaallaat aqqutissiuisutut inissisimallutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq