Hans Enoksen: Uanga Siumumi siuttuuvunga

Siumup 2008-mi ataatsimeersuarnerani Aleqa Hammondip Hans Enoksen unammillerpaa, iluatsinnaguli, Hans Enoksenillu maanna erseqqissarpaa, Siumup malitttarisassaani aalajangersagaammat, partiip siulittaasua aamma Naalakkersuisuni siulittaasutut qinerneqartassasoq.

- Aatsaat taamaattoqanngilaq. 2005-imi Inatsisartunut qinersinermi aamma Lars-Emil Johansen saqqummerpoq, siulittaasoq taarserniarlugu. Uanga nalornissuteqanngilanga taaqqunngatissaqarnangalu. Isumaqarpunga suliassakka naammattumik akisussaassuseqartumik suliarisarlugit, Hans Enoksen oqarpoq, isumaqarlunilu, Naalakkersuisut siulittaasuuneq naalakkersuisuuginnarnermiit allaanerusoq.

- Inuiaqatigiinni ukiuni makkunani allannguiniarnerit annertuut inuit ilaannit akuerineqanngillat, tamakkualu aamma uanga upissunneqartarninnut pissutaaqataapput.

Kisianni Aleqa Hammondip naalakkersuisunut siulittaasussatut sassarnera, Siumup ilaasortaasa immikkuualutsitaalersimanerannut ersiutitut isigineqarsinnaanngila?

- Tamanna Siumumiinnaanngilaq, partiini allani aamma taamaappoq. Taamatut nalunaarneq imaanngilaq avissaartuunnermik kinguneqassasoq. Siumup iluani oqallinerit sakkortusaraluartut, politikkikkut anguniakkavut ersarittuaannarput, aammalu pisinnaasorpassuit oqalliseqataasarnerat nukittorsaatigisarparput, Hans Enoksen akivoq erseqqissarlugulu, partiip siulersuisuisa nammineq siulittaasuunini maannamut apeqqusersimanngimmassuk.