Hans Enoksen tunuarniummik tigusaqannginnerarpoq

Ineqarnermut attaveqarnermullu naalakkersuisoq Jørgen Wæver Johansen ippassaq tusarfimmit tutsuiginartumit oqaatigineqarpoq Naalakkersuisutut tunuartussanngortoq, tamanna pillugu Naalakkersuisut siulittaasuat Hans Enoksen oqaloqatigaarput.

Aperaarput, tusarfimmik tutsuiginartumit tusagarput naapertorlugu Jørgen Wæver Johansen naalakkersuisutut tunuartussaasimasoq suliffeqarfinnullu siunnersuisartuni Greenland Venture A/S-imi pisortanngortussaasimanera ilisimasaqarfigineraa.

- Suli uannut apuuttoqanngilaq, taamaattoqarsimassappat soorunami apuutereersimassagaluarpoq. Allami sulilissaguni tunuarniummik tigusaqartussaassagaluarpunga kisianni tigusaqanngilanga, Hans Enoksen oqarpoq.

Nangilluta aperaarput inuttaa nammineerluni ippassaq oqarsimasoq soraarnissaminik oqaluttoqarnera assortorsinnaanngikkini, taamaattumillu tamanna naalakkersuisooqatigiit tamanna piareersimaffigineraat.

- Oqaatigereerpara isummersuutinik arlaannilluunniit uannut apuuttoqanngimmat taamaattumik tamanna piareersimaffiginngilara, soorunami apuuttoqassappat taava pinngitsoorani eqqartorneqartussaassaaq, akivoq.

Qalleqqillugu aperaarput tusarfik tutsuiginartoq oqartoq januaarip aallaqqaataanni Jørgen Wæver Johansen suliffittaassamini sulertussaasimasoq, taamaattumillu januaarip aallaqqaataa ungasigunnaarmaat piareersimaffigisariaqassagaat.

- Takkuttoqassappat eqqartussavarput allamik oqaasissaqanngilanga ilisimasaqannginnama, naalakkersuisut siulittaasuat Hans Enoksen oqarpoq.