Hans Enoksen Savalimmiuniippoq
Kalaallit Nunaata Savalimmiullu akunnerminni isumaqatigiissutaat annertusineqarpoq.
Naalakkersuisut siulittaasuata Hans Enoksenip aamma Savalimmiuni naalakkersuisut siulittaasuata Jóannes Eidesgaardip isumaqatigiissut nutaaq ullumi atsiorpaat.
Nunani taakkunani inuussutissarsiornermut, ilinniarnermut ilisimatusarnermullu tunngasut suleqatigiissutigineqarnerunissaat atsiorneqarpoq.
Aalisarnermut isumaqatigiissutip nutarterneqarnera aamma atsiorneqatigiissutigineqarpoq.
Savalimmiuni naalakkersuisut siulittaasuata Jóannes Eidesgaardip Ilulissani ukioq kingulleq aggustimi tikeraarnerata nalaani isumaqatigiissusiortoqarnissaa siunniunneqartoq taamaasilluni piviusunngortinneqarpoq.
Savalimmiut Kalaallit Nunaatalu akornanni takornariaqarneq pillugu isumaqatigiissuteqareerpoq. Aalisarneq pillugu isumaqatigiissut 1998-imeersoq ukiut tamaasa nutarterneqartarpoq.
Naalakkersuisut siulittaasuat Hans Enoksen ulluni makkunani pisortatigoortumik Savalimmiuni tikeraartoq isumaqatigiissut pillugu oqaaseqartinniaraluaratsigu iluatsinngilarput.
