Hans Enoksen sakkortuumik isorineqarpoq

Nunatta karsiata ukioq 2005-imut naatsorsuutaanik akuersissuteqarnissap Inatsisartuni aappassaaneerneqarnissaanut atatillugu Inatsisartut Kukkunersiuinermut Ataatsimiititaliaata Naalakkersuisut siulittaasuat Hans Enoksen sakkortuumik isornartorsiorpaa, avisimi Sermitsiami taama allaaserinnittoqarpoq.

Hans Enoksenip 2005-imi aalisarnermut naalakkersuisutut atorfimminik ingerlatsisimanera Inatsisartut Kukkunersiuinermut Ataatsimiititaliaata sakkortuumik isornartorsiorpaa. Hans Enoksen inatsisinik marloriarluni unioqqutitsisimanera erseqqissuliuutigineqarpoq, Sermitsiami allaaserineqarpoq.

Hans Enoksenip aalisarnermut naalakkersuisuunermi nalaani pisassiissutinik angallammiit angallammut allamut nuutsinissaq akuerisimavaa,

aamma angallat suli pisassinneqanngitsoq aalisarsinnaanngortissimavaa taamalu iliornerit Aalisarnermut Inatsimmut akerliupput.

Sermitsiaq allappoq Hans Enoksenip taama iliuuserisarsimasani politikkikkut aalajangernertut nassuiaateqartikkai.

Nunatta karsiata naatsorsuutai Inatsisartuni novembarip qulinganni aappassaaneerneqassapput, Kukkunersuinermullu Ataatsimiititaliap isorartorsiuinera tunngavigalugu tatiginninnginnermik ersersitsisoqarnissaa naatsorsuutigineqartoq, avisimi Sermitsiami taama allaaserinnittoqarpoq.