Hans Enoksen: Royal Greenland-imi siulittaasuussagaanni Siumukkormiuusariaqanngilaq

Royal Greenlandimi siulittaasuussagaanni Siumukkormiuunissaq pisariaqanngilaq – imaluunniit partimut allamut ilaasortaanissaq piumasaqaataanngilaq.

Hans Enoksen Palle Christiansenimut Demokraatineersumut taama akissuteqarpoq.

Palle Christiansenip Peter Grønvold Samuelsenip Royal Greenlandimi siulersuisuni siulittaasunngornera pillugu arlalinnik apeqquteqarsimavoq – ilaatigullu apeqqutigalugu Siumukkormiuuneq immikkut piukkunnaataanersoq.

Kisianni tassa taamaattoqanngilaq, Hans Enoksen akissummini allappoq.

Akissummi taanna kisimi paasissutissiissutigineqarpoq.

Tassami Hans Enoksenip oqaluttuarerusunngilaa siulersuisut siulittaasuattut qassit piukkunneqarsimanersut, soorluttaaq taamaallaat oqaluttuarerusukkaa Peter Grønvold Samuelsen siulittaasunngortinneqartoq suliamut inuttullu piginnaasai taamaallaat aallaavigalugit, taakkuali suunersut oqaluttuarinngilai.

Demokraatit akissut naammaginartinngilaat pineqartorlu pillugu nutaamik apeqquteqarniarlutik Palle Christiansenip oqaatigaa.