Hans Enoksen: Qaanaap Kommunea aningaasanik atorniarsinnaavoq, kisianni...

Qaanaap kommunea aningaasatigut ajornartorsioqisoq kommunit nakkutilliisoqarfianit 7 millioni koruuninik atorsinnaasoq naalakkersuisut inassutigaat akuerineqassasoq.

Atukkat ukiut pingasut qaangiutsinagit tassalu ukioq 2009 qaangiutsinnagu taarsereersimaneqarnissat piumasaqaataavoq. Aningaasat Qaanaap kommuneata pisortanut akiligassaanut atorneqartussatut atukkiunneqarput, tamatumalu kingorna nunatta karsia ikiueqqissinnaanngitsoq kommunit nakkutilliisuata siulittaasua naalakkersuisut siulitaasuat Hans Enoksen oqarpoq:

- 7 millioni koruuninik massakkut taarsigassarsisitsinissami aamma piumasaraarput kommunimik allamik pinngitsooratik suleqateqassasut, tassalu Ilulissat Kommuneat suleqatigineqassasoq. Aningaasat kingusinnerpaamik 2009-mi akilerneqareersimanissaat piumasaraarput, tassa kommunit kattussuunneqannginnerisa kingorna, Hans Enoksenoqarpoq. Taanna ilanngullugu oqarpoq 7 millioner koruunit atukkiunneqartut Qaanaap kommuneata naammagissanngippagit innuttaasunut kiffartuussinini appartittariaqassagaa nangipporlu:

- Qaanaap Kommunea ajornartorsiormat imaanngilaq karsi ammatiinnarneqassasoq, sukannersumik aqunneqassapput, naalakkersuisut siulittaasuat Hans Enoksen oqarpoq. Aningaasaqarnermut inatsit inatsisartuni pingasunngorpat akuersissutigineqarpat, Qaanaap kommunea 7 millioni koruuninik atorniarnera ilanngullugu oqallisigineqassaaq. Qaanaap kommuneani borgmesteri Johanne Nielsen oqaaseqartinniarsimagaluarparput, atorniarnerli pisortatigoortumik akuersissutigineqarpat aatsaat oqaaseqarsinnaanerarpoq.