Hans Enoksen: Politikkerit kisimik pisuungillat

DR-ip piviusulersarusiaa ”Kalaallit Nunaanniit qimarranneq” Naalakkersuisut siulittaasuata Hans Enoksen-ip takoreerlugu, oqaaseqarfigaa politikerit kisimik akisussaangitsut Kalaallit Nunaanni ajornartorsiutinut.

- Aallakaatsitassiami saqqummiussineq malugaara illuinnaasiortoq, Hans Enoksen oqarpoq.

Meeqqat sumiginnakkat takullugit akisussaaqataasutut misiginanngila?

- Innuttaasut piumaffigissavakka iluamik inuunerinnerulertariaqartugut, akisussaaffeqarnerulertariaqarlutalu. Akueriinnarsinnaanngilarput avataanniit taamak kusanaatsigisumik saqqummiunneqartarnerput. Minnerunngitsumik meeqqanut sumiginnaaginnartarneq pillugu angajoqqaat akisussaasuseqartumik meeqqatik isumagisariaqarpaat. inuit inuunerinnerulernissaat Politikkikkut oqariartuutiginiarparput, iluatsissinnaangilarpullu ajornartorsiummut ikioqatigiinngikkutta, Hans Enoksen oqarpoq.

Inuit imigassanik ikiaroornartunillu atornerluisut katsorsarneqarnissaminnik pisariaqartitsisut, ikiorneqarsinnaanngitsullu aningaasassaqannginneq kommuniniillu tapersorsorneqannginneq pissutigalugu. Isiginngitsuusaaginnarniarpisiuk?

- Isumaqarpunga pisortanut akisussaatitsiniarneq taanna qimalluinnartariaqaripput, aamma nammineerluta uagutsinnut annertunerusumik piumaffigigutta ulluinnarni ajornartorsiutigut annertuumik qaangersinnaavagut. Suna tamaat pisortat akilersinnaanngilaat. Taamaammat inuttut ataasiakkaatut nammitsinnut piumaffiginiarta aatsaat taamaalippat pisortat nukissaqarnerulissapput, Hans Enoksen oqarpoq.

DR-ip piviusulersaarusiaa politikkerinut eqeersitsiva?

- Isumaqarpunga qallunaat taamatut saqqummiussigaangata aatsaat aviisiliortut eqeerniartarnerat unitsinneqartariaqartoq, Hans Enoksen oqarpoq.