Naalakkersuisoqatigiit aallarteqqaarneranni naalakkersuisut arfineq pingasuusimasut maanna arfineq maluinnanngortinneqarnerannut oqaaseq “sipaarniarneq" qitiutinneqarpoq. Aamma Namminersornerullutik Oqartussani pisortaqarfiit maanna 14-iusut amerlavallaartut, naalakkersuisullu amerlassusaannut aallaavigalugit aaqqissuunneqassasut, naalakkersuisut siulittaasuat Hans Enoksen oqarpoq.
2008-mi aningaasanut inatsisissami, aggustip arfineq-pingajuani saqqummiunneqartussami, kissaatit aningaasaliissutigineqarsinnaasullu 200 millioni koruuninik nikingapput, naalakkersuisullu taamaalillutik sipaarutissanik ujarlertariaqarput.
- Aningaasat taama amerlatigisut sipaarneqartussaammata sulisut ikinnerulertussaapput, pisortaqarfiit ikinnerulertussaapput, kisianni soraarsitsiortornikkut anguneqassanngilaq. Aaqqissuussilluarnikkut anguneqassaaq. Sulisut namminneerlutik suliunnaartartut atorlugit tamanna aaqqinneqarumaarpoq, Hans Enoksen oqarpoq.
Naalakkersuisut Pisortaqarfinnilu atorfilittat tamarmik angalanerannut aningaasartuutit affaannanngortinneqassapput, aamma pisortaqarfinni tamani ilassinninnernut aningaasartuutit appaavigineqassapput, soorluttaaq pisortaqarfinni tamani IT-mut aningaasartuutaasartut ataatsimut katiterneqassasut, taamaalilluni tamakkununnga aningaasartuutit aqulluarneqarnerulerniassammata.
