Hans Enoksen Paul Okalik-llu Bruxelles-iliaqatigiilerput

Nunatsinni Nunavummilu naalakkersuisut ukiaru Europamut angalaqatigiissapput, inuit puisinniariaassiannik paasisitsiniaajartorlutik. EU-mimi nunat arlallit puisip amianik tunisassianik eqqusseqqusiunnaarniarlutik ilimasaaruteqareerput.

Naalakkersuisut siulittaasuata Hans Enoksenip EU-mi siulittaasup Barruso-p upernaaq tikeraarsaanera atorluarniarpaa, imalu Paul Okalik-lu Narsami ippassaq isumaqatigiissutertik pillugu oqarpoq:

- EU-mi nunat arlallit attavigineqassapput aammalu Barruso maanga tikeraarami tikeraarsarpaanga piniakkanik atuinitta puisinniarnermullu tunngasunik oqalugiaateqarnissara kissaatigalugu, Hans Enoksen nassuiaavoq.

Naatsorsuutigaa piffissami qanittumi ukiamut angalanissartik aaqqinneqarumaartoq.

Nunavut paasisitsiniaanermi sooq peqataassanersoq aperigatsinni naalakkersuisut siulittaasuat akivoq:

- Ataasiukkaarluta taama annertutigisumik akerliusut akiorniarneranni nukiit killeqartarput, taamaattumik ataatsimoorullugu piakkanik atuinerput paasisitsiniaassutigissavarput. EU-mi nunat silarsuup pissusaata allanngoriartorneranut namminneq ajornartorsiutit pilersitatik isuamqarpunga eqqartornerusariaqaraat, inuit atuinerat kisiat isiginiaannarnagu, erseqqissaavoq.

Canadamiut ilisimaneqarput puisit niaquisigut ikuttarlugit avaartarlugilluunniit puisinniartartutut. Nunatta taanna akornutigilersinnaannginnerlugu?

- Inuit puisinniarnerat ikuttaanermik tunngaveqanngilluinnaqqissaarpoq, aamma Nunavut-miut akerlilersugarivaat avaartaalluni puisinniartarneq, Nunavumi piniartut uagutsitorluinnaq anooriaaseqarput puisinniartaaseqarlutillu. Isumaqarpunga taanna ersissutigisariaqanngitsoq, akerlianilli iluatinnarpoq ataatsimoorluta avammut saqqummernissarput, minnerunngitsumik kattuffiit ICC, KNAPK Nunavummilu susassaqartut allat peqatigalugit, Hans Enoksen oqarpoq.

Lars Vesterbirk, EU-p qullersaqarfiani Bruxelles-imiittoq tikeraartoqarnissamut assut isumalluarpoq. Tikeraarnerli siunissami qanoq kinguneqarumaarnersoq nalunarnerarpaa, anguniakkat sivisungaatsiartorsuarmik suliarisariaqartarmata.