Hans Enoksen: -Nunaqavissut soraarsinneqassanngillat!

- Nunaqavissut soraarseriarlugit nunani allaneersunik atorfinititsineq akuerineqarsinnaanngilluinnarpoq, taama oqarpoq, Naalakkersuisut siulittaasuat Hans Enoksen.

Taassuma taama oqarneranut tunngaviuvoq KNI Assartuivik A/S-p umiarsuaataani kalaallinik arlalinnik tuluttut oqalussinnaannginneq tunngaviginerarlugu soraarsitsiortortoqarsimanera.

-Assorujussuaq tusarlugu ilungersunartutut tiguara, taamanikkut nunaqarfinnut kiffartuussinerup ataatsimoortinniarneqarnerani neriorsuutigineqarmat sullissineq akikinnerullunilu pitsaanerulissasoq minnerunngitsumillu aamma sulisunik soraarsitsisoqassanngitsoq, Hans Enoksen oqarpoq.

Taassuma erseqqissaatigaa isumaqatigiissummi kalaallit umiartortut tamarmik atorneqarnissaat taamalu soraarsinneqannginnissaat isumaqatigiissutigineqarsimasoq.

- Annertuumik ataatsimoortitsiniarneq ilungersuussimavarput naak politikkikkut annertuumik aporfilersorneqaraluarluta upperigatsigu inuiaqatigiinnut akikinnerusumik minnerunngitsumillu nunaqavissut atorluarneqarnissaat tassani siunnerfigineqarmat, oqarpoq.

Aperaarput KNI Assartuivik A/S-p pisortaata Frederik Olsenip tamanna soraarsitsinertut isigisimanngikkaa taamalu naleqqussaanertut isigisimammagu nammineq tamanna naleqqussaanertut taasinnaaneraa.

- Naleqqussaanertut taarusukkunikku taaniarlissuk, kisianni taamanikkut inatsisartunut ilisimatitsivunga kalaallit umiartortut tamarmik atorneqassasut soraarsitsisoqassanngitsorlu, massakkut soraarsinneqarput aanali ilungersunartua nunami allamiut russit polenimiullu eqqartorneqarput. Kalaalinngorsaanermut ilungersuussisuulluni akuerineqarsinnaanngilluinnaqqissaarpoq! Kalaallit nunaqavissut misilittagaqarluartut soraarseriarlugit allamiunik atorfinititsineq taanna attassinnaangilarput! Enoksen oqarpoq.

Taanna qalleqqissaavoq KNI Assartuiviup neriorsuutigineqarsimasut naammassissagai tassalu kalaallit soraarsinneqassanngitsut kalaalinngorsaasoqassasorlu.

- Taakku neriorsuutitik naammassisinnaanngikkunikkit kingunissaat eqqarsaatigisariaqarpaat massakkullu sukannersumik naalakkerneqartariaqalerput! Hans Enoksen oqarpoq.

Taannattaaq Naalakkersuisut siulittaasuattut taamatut oqassalluni pisussaanerarpoq.