Hans Enoksen: Nuannaartupilussuuvugut

- Kommunerujussuarni sisamani taaguunneqartut ataatsimut katillugit suli kisitsisaatigineqanngikkaluartut oqartoqarsinnaavoq Siumut sumiiffinni tamani ajugaasoq. Soorlu Uummannap nunaqarfiini ajugaasaqattaarpugut. Nunaqarfinni aqutsisussanik qinersinermi inissat tamakkerpaat, Siumumi siulittaasoq Naalakkersuisullu siulittaasuat Hans Enoksen unnuaq qeqqalersoq oqarpoq.

Maluginiarpaa Tunumi Siumut Atassullu siuttuusut nunallu sinnerani Siumut Inuit Ataqatigiillu.

- Ersarilluinnarpoq Siumut taaguunneqarluarsimasoq. Nunaqarfinnut tunngatillugu anguniakkagut ajunngilluinnartut qinersisartut nalilerpaat. Soorunami pisisartut aningasaatikilliartornerat inuussutissarsiutitigullu ajornartorsiornerit tusartarpagut, soorlu nunaqarfinni tunitsiviit matusut allallu pisartut arajutsisimanngilagut. Taakkuli naalakkersuinikkut pikkorliornerunngillat. Nunarsuarmiuna aningaasarliorneq taama kinguneqartitsisoq. Aamma nunaqarfiit inukilliartorput, amerlanertigut angajoqqaat meeqqamik ilinniagaqarnissaat pillugu nuuttarlutik, Hans Enoksen nassuiaavoq.

Ataatsimoorussamik nunaqarfinni aqutsisussanik nuna tamakkerlugu 26-nik qinersisoqarmat, inuit 106-it qinigaapput. Nutaarsiassat qinersinermut tunngasut nittartakkatsinni knr.gl-imi aamma atuarneqarsinnaapput.