Hans Enoksen: -Nannut nungukkiartunngillat
USA-p nanoq uumasut nungunneqarsinnaanissamik ulorianartorsiortinneqartutut nalilikkat allattuivianut ilanngunneqarnissaa qanittumi aalajangiiffigaa.
Naalakkersuisut Amerikamiut taama aalajangersimanerisa piniarnermik inuussutissarsiuteqarnermut kingunissaanik ilisimatippaat naqissuserlugulu taama aalajangiinermi inunnut attuumassuteqartortai isiginiarneqarsimanngitsut. Kalaallit Nunaat isumaqarpoq piujuartitsinermik tunngaveqartumik nannunniarsinnaaneq aqutsilluarnikkut qulakkeerneqarsinnaasoq.
Naalakkersuisut siulittaasuata Hans Enoksen-ip Amerikamiut ilisimatuussutsikkut tunngaveqartumik nannut pillugit aqutsisoqarneranik nassuiaateqarfigai. Kalaallit Nunaanni ukioq manna nannuttassiissutigineqartut 135-upput, taakkulu piniartut isumaat naapertorlugu ikinaagaavallaartutut isigineqarput.
- Amerikamiut uumasut nungunneqarsinnaanissamik ulorianartorsiortinneqartutut nalilikkat allattuivianut nanormik ilangussinerat ilungersunarluinnartutut nalilerparput. Silaannaap kissatsikkiartornera peqqusiullugu nannut nungutaanissaannik oqalunneq isumaqatiginngilarput. Nannunniartarneq piniartuunermik inuussutissarsiuteqarnerup attatiinnarnissaanut pingaaruteqartuuvoq. Maanna Amerikamiut taama ilungersunartigisumik aalajangiipput taamatullu ineriartortoqalernera Issittumi tamarmi piniartuunermik inuussutissarsiuteqarnermut sunniuteqapilunnissaa aarleqqutigaarput, Naalakkersuisut siulittaasuat Hans Enoksen oqarpoq.
USA-p Kalaallit Nunaatalu nanoqassuseq tutsuiginaateqarnerusumik naliliiffiginiarlugu ilisimatuussutsikkut misissuinerni suleqatigiinnerunissaat tamatumalu kingunerisaanik pitsaanerusumik aqutsisoqalernissaanik qularnaarinninnissaq USA-mit neqeroorutigineqarpoq. Naalakkersuisut Amerikamiunik taama suleqateqarnerunissaq ammaffigaat.
