Hans Enoksen: Naalakkersuinikkut aaqqissuussisoqartariaqarpoq

Kalaallit Nunaanni aaqqissuussinissamut Siumup takorluugai pillugit politikerit arlallit oqaaseqaataannut Naalakkersuisut siulittaasuat, Hans Enoksen maanna akissuteqarpoq.

Soorlu ammip qalipaataa tunngavigalugu pinngitsaaliissutigalugu avissaarsimatitsisarnissamik Kalaallit Nunaannut eqqussiniartutut Demokraatineersup Palle Christiansenip Siumut pasillerpaa.

-Tamanna ilumuunngilaq, Hans Enoksen oqarpoq. Aalajangersimasumik paasinarluartumillu erseqqissarlara, ammip qalipaataa tunngavigalugu pinngitsaaliissummik avissaarsimatitsisarneq, ammillu qalipaataa tunngavigalugu assigiinngisitsisarneq, kiisalu upperisaq atoqatigiinnikkullu sammisartakkat pillugit immikkoortitsisarnerit Siumup akerleriuaannarmagit akerleriuaannassallugillu.

Siumut tassaavoq partii, Kalaallit Nunaata namminiilernissaanik illersuisoq. Kalaallit Nunaat namminersortoq tassaassaaq nuna naalagaaffik inatsisinik tunngaveqartoq. Naalagaaffik inuit tamarmik oqartussaaqataanerat aamma inatsisit tunngavigalugit aqunneqartoq. Pitsaanerpaamillu taamaaliortoqarsinnaavoq nunatsinni tunngaviusumik inatsisissatta suliaralugu allanneqariarluni tamatuma kingorna akuerineqarneratigut, Hans Enoksen allappoq.

Kikkunnulluunniit tupaallassutaasinnaanngilaq siunissami Kalaallit Nunaanni naalagaaffimmi namminersortumi inuit najugaqartussat tassaassammata kalaallisut innuttaassuseqartut. Nunat tamalaat akornanni naalagaaffittut akuerisatut ataqqineqarluni inissisimassagaanni taamatuttaaq pingaaruteqarpoq, nunagisami namminermi innuttarisat aamma nunat allamiut pillugit innuttaassuseqarnermut tunngasut pissutsit ajunngitsumik aaqqiivineqarsimanissaat.