Hans Enoksen: Maalaarutit sukkanerusumik akineqartalissapput

Isumaginninnermi Maalaartarfimmi suliat sivisuallaarujussuarmik suliarineqartarput, taama Naalakkersuisut siulittaasuat Hans Enoksen Demokraatit sinnerlugit Inatsisartunut ilaasortamut Lene Knüppelimut akissuteqaammini nassuerpoq.

Taamaattumik Hans Enoksenip neriorsuutigaa, Isumaginninnermi Maalartarfimmi suliat sukkanerusumik naammassineqartalernissaat anguniarlugu, sulisut ilaneqaqqissasut, immaqa avataaneersumik suliaqartitsinikkut.

Naammagittaalliuutit septembarip aallaqqaataani naammassineqarnissamut utaqqisuutigineqartut 497-iusut, Naalakkersuisut Siulittaasuata ilanngullugu nalunaarutigaa.

Amerlanersaat tassaapput innarluutilinnut, pisortat ikiorsiisarnerannut utoqqalinersiutinullu tunngasut. Naammagittaalliuutit pingaartumik innarluutilinnut tunngasut amerliartuinnavissimapput, 196-iusimagamik.

Maalaarutit ullumikkut agguaqatigiissillugu qaammatini 24-ini, tassa ukiuni marlunni suliarineqartarput. Naalakkersuisullu isumaqarput, suliap suunera apeqqutaatillugu utaqqisitsisarneq qaammammit ataatsimit ukiup affaanut sivisussuseqartariaqartoq.