Hans Enoksen: Kim Kielsen Wæverimut taartaassaaq
Ineqarnermut Attaveqarnermut Aatsitassanut ikummatissanullu naalakkersuisup Jørgen Wæver Johansenip, Naalakkersuisut siulittaasuata Hans Enoksen-ip, Siumut sinnerlugu inatsisartuni ilaasortaq Kim Kielsen taartissaatut innersuussutigaa.
Kim Kielsenip Ineqarnermut Attaveqarnermut Aatsitassanut ikummatissanullu naalakkersuisunngortinneqarnissaanut innersuussuteqarnini Hans Enoksenip ima tunngaveqartippaa:
- Kim Kielsen innersuussutigaara, Inatsisartuni ilaasortaammat eqeersimaartoq suliassanillu misilittagaqarlualersimasutut annertuumik ingerlatsilluartuummat.
- Inuusuttuuvoq, nalunngilaralu ilumoorluni pitsaasumillu kiffartuusserusulluni Inatsisartunut ilaasortaasoq.
Kim Kielsenip akuerineqarluni naalakkersuisunut ilanngutissaguni akisussaaffigisassai annertoorujussuupput. Akisussaaffigiligassani qanoq ilisimasaqarfigitiginerai naleqqunnersorlu Hans Enoksen aperigatsinni akivoq:
- Ilumoorputit akisussaaffik annertoqaaq aamma suliassaqarfia annertoorujussuuvoq, imaanngilarli Kim-ip kisimiilluni suliassaq ingerlatissagaa. Tassami naalakkersuisooqatigiit ataatsimoortumik sulisarpugut, nalunngilaralu pisariaqarfiatigut ikiorluarsinnaallugu siunnersorsinnaallugulu. Minnerunngitsumillu Kim politikkerinngorniarnermi siornagut inuiaqatigiinni malinnaalluarnikuuvoq, taamaammat pingaartumik sanaartornermut angallannermullu naalakkersuisunngornissaanut ajukkutinngilluinnarpara.
Jørgen Wæver Johansenip taartissaatut Kim Kielsen kisimi piukkunneqarsimanngitsoq Enoksen aamma oqarpoq.
Erseqqissaatigaa qineqqusaartarnermini qinersisartunut neriorsuutini eqqortikkumagini, tassalu Inatsisartunut qinigaasumik naalakkersuisoqartassasoq.
Kim Kielsen-ip Naalakkersuisuusimasoq Jørgen Wæver Johansen taarserlugu Naalakkersuisunut ilaasortassatut innersuussutigineqarnera Inatsisartut martsip qulingiluaanni ataatsimeeqqilerneranni aalajangiiffigineqassaaq.
Jørgen Wæver Johansenip naalakkersuisuni ilaasortatut taartissaatut innersuussutigineqartoq Kim Kielsen Inatsisartunut 2005-imi novembarip 15-ianni qinersinermi qinigaavoq, tamannalu sioqqullugu Paamiut kommunalbestyrelsiani 2005-imi aprilip tallimaanni qinersinermi Siumut sinnerlugu qinigaalluni. Kim Kielsen Nuummi politinngorniarfimmit polititut
ilinniakkaminik 1996-imi aamma naammassinnippoq.
