Hans Enoksen: Inatsisartunut qinersissaagut
Naalakkersuisut siulittaasuat Siumumeersoq Hans Enoksen Inatsisartunut novemberip 22-ani qinersinissamik suaaruteqarpoq, tamannalu pivoq, aningaasanut inatsisissap aappaagumoortup Inuit Ataqatigiillu unnummut isumaqatigiissutiginngitsoormassuk. Tamanna pillugu naalakkersuisut siulittaasuat ima oqarpoq:
- Tassami uani partiinik isumaqateqarnissarput soorunami pingaartissimavarput aamma peqataaffigaarput. Kisiannili isumaqatigiinniarnerni ukunani partiitta piumasaat naammassiniartussaavakka naalakkersuisooqatigiinnermilu isumaqatigiissutip atsiorneqarsimasup malitsinneqarnissaa akisussaaffigalugu. Taamaattumik isumaqatigiissutivut tunuinnarnissaat attassinnaanngilara akuerisinnaanagulu. Naalakkersuisut siulittaasuat nassuiaavoq.
Naalakkersuisooqatigiit akornanni aningaasanut inatsisissamut tunngasut suunuku isumaqatigiinngissutigisimagisi ?
- Naalakkersuisooqatigiit ukioq ilassummik isumaqatigiissuteqaratta, meeqqanut sipaagaqartitsinissaq 19 million koruuninik aningaasartalik isumaqatigiissutigaarput. Allaffissuarmik pisiniarneq 30 million koruuninik aningaasartalik peqataaffigiumasimanngilarput, taamatuttaaq friskolemik pilersitsiniarneq 15 million koruuninik naleqartussaq peqataaffigerusussimanatigu. Taakku peqataaffigerunngilavut, ullumikkut inuiaqatigiinni killiffipput, pingaartumik meeqqat atuarfii eqqarsaatigalugit iluarsaanissaq pitsanngorsaanissarlu annertoorujussuaq ilaatigut akissaqartinngitsutut ilillugu allaffissuarnik pisiortornissarput Siumumi attassinnaasimannginnatsigu. Hans Enoksen nassuiaavoq.
Aningaasanut inatsisissaq saqqummiunneqareermat naalakkersuisooqatigiit isumaqatigiissuteqarsinnaanissaminnut soorlu imminnut qaninnerpaassagaluartut, taamatulli isikkoqanngilaq ?
- Taamaappoq, tupinnaqaat aporfigisaqattaakkavut, uffalu naalakkersuisooqatigiilluta. Kisianni tassa naalakkersuisooqatitta Inuit Ataqatigiit akuerisinnaasimanngilaat 19 million koruuninik aningaasartaliinissaq, uffalu ukioq isumaqatigiissutigereerlutigu aappaagumut ilanngunneqassasut. Tamakkuupput ingerlariaqqinnissamut aporfigisimasavut. Taamaattumik naalakkersuisunikkut kingullertigut pisut eqqarsaatigalugit silaannaq tujorminaqisoq salinniarlugu inuiaqatigiit aperineqarnissaat pitsaanerutissimavara, kikkullu naalakkersuisuusariaqarnersut aperineqassasut. Hans Enoksen nassuiaavoq.
- Killiffiuvoq ersarissoq, tassalu ingerlariaqqissinnaanngilanga naalakkersuisut siulittaasuattut pissutsit taamaatsillugit. Aamma ilungersunarpoq, attassinnaanngilarali, taamatut ingerlaannassalluta. Taamaammat innuttaasut aperinissaat pingaartissimavara. Hans Enoksen oqarpoq.
Hans Enoksen aamma oqarpoq, Inatsisartut siulittaasuat Jonathan Motzfeldt qinersinissamik piumasaqaammik allaffigileruttorlugu, allakkallu taakku tunngavigalugit Inatsisartut aggersarneqassasut.
