Hans Enoksen atorfilittaminit illerneqarpoq
Kukkunersiuinermi ataatsimiititaliap siulittaasua atassummik tunuliaqutaqartoq 25-nik ukiulik Kristian Jerimiassen Hans Enokseni inatsisinik unioqqutitsisimanerarlugu tusagassiutini uissuummisitsilluni assortuunnermik pilersitsisimasutut Naalakkersuisut allattoqarfiata ullaaq manna oqaatigaa.
Kristian Jerimiassenili qassiiliortitsisutut oqaatigineqaraluarluni annilaajallanngivippoq.
- Suliaqarnitsinni suliagut naammassisimavagut taavalu isumaliutissiissut Siumuminngaanniit Inuit ataqatigiinninngaanniit Demokraatiniit aammalu Atassummiit atsiorneqarpoq, taamatullu isikkoqartillugu akuersissutigineqarpoq, tassa taamaappoq, Kristian Jerimiassen oqarpoq.
Kukkunersiuinermut ataatsimiititaliap isumaliutissiissutaani Hans Enoksen aalisarnermut inatsimmik unioqqutitsisimasutut oqaatigineqarpoq – ullaaq mannalu naalakkersuisut allattoqarfianneersumit Hans Enoksen taperserlugu nalinginnaanngitsumik tusagassiutinut nalunaarummik takkuttoqarpoq
Tusagassiutinut nalunaarummi atsiorneqanngitsumi kukkunersiuinermut ataatsimiititaliap ima naqissusiisimanera erseqqissarniarneqarpoq.
Issuaaneq aallartippoq:
”- Inatsisartut kisimik Kukkunersiuinermut Ataatsimiititaliap uparuaataanik Naalakkersuisuni ilaasortanut ataasiakkaanut akisussaatilluni kinguneqartitsinissamut aalajangiisinnaassuseqartuupput” issuaaneq naavoq.
- Aalisarnermununa pisortaqarfik Deloitte kukkunersiuimmat aalisarnermut pisortaqarfiup saqqummiukkaa inatsimmik akerliusumik saqqummiussisoqarsimasoq, Kristian Jerimiassen oqarpoq.
Namminersornerullutik Oqartussani pisortaq Kaj Kleist oqarpoq tusagassiutinut taama nalunaaruteqartariaqarsimallutik kukkunersiuinermut ataatsimiititaliap isumaliutissiissutaa tusagassiutitigut sammineqartorujussuanngornera pissutigalugu.
Kaj Kleist aperaarput, kukkunersiuinermut ataatsimiititaliaq isumaqaruni inatsisinik unioqqutitsisoqarsimasoq taava taakkuunnginnersut oqaaseqartuusussat.
- Isumaliutissiissummi taamatut allassimasoqanngilaq, kukkunersiuinermulliuna ataatsimiititaliami siulittaasup Kristian Jerimiassenip avammut oqaaseqarnermini Naalakkersuisut siulittaasuat inatsisinik unioqqutitsisimanerarlugu oqartoq, taama Kaj Kleist oqarpoq.
Namminersornerullutik Oqartussani pisortaq Kaj Kleist aammattaaq oqarpoq tusagassiutinut nalunaarummik nassitsinerminnik Hans Enoksen ilisimatissimagini.
