Hans Enoksen: Angallannermut politikki pitsanngorsartariaqarpoq

Innaallagissamut imermullu assigiimmik akeqartitsinerup atorunnaarsinneqarnerata kingorna isorliunerusuniittut eqqugaasimanerat Atassummiit arajutsisimaneqanngitsoq, partiip Atassutip siulersuisui inatsisartunilu ilaasortaatitaat oqariartuutigaat.

Atassut sapaatip akunnerata naanerani ataatsimiippoq, angallannermullu politikkip naliliiffigeqqinneqartariaqarnera pingaarnertut aamma oqariartuutigineqarluni.

Angallannermut politikkip maanna ingerlanneqartup pingaartumik isorliunerusunut eqquinerlussimanera naalakkersuisut siulittaasuata Hans Enoksenip aamma arajutsisimanngilaa, inatsisartulli tamanna pillugu aalajangiisuusussaasut erseqqissaatigalugu:

- Aningaasanik immikkoortitsisoqassappat inatsisartut isummertinneqartariaqassapput. Ilumoorpoq angallannermut tunngasoq ajornartorsiutinngorsimavoq aamma tusaanngitsuusaaginnarlugit ingerlaniarsinnaanngilagut, innuttaasut kissaatigisaat sapinngisamik tusaaniartariaqassavagut, qanimullu suleqatiginissaannik oqariartuuterput timitalerneqarnissaa sulissutigisariaqarparput, Hans Enoksen oqarpoq.

Atassutip tusagassiuutinut nalunaaruteqarnermini taamatut oqariartuuteqarnera, Hans Enoksenip paasilluarsinnanerarpaa, partiimmi tamarmik aamma tunuliaqutaqarput, naalakkersuisut siulittaasuat oqarpoq:

- Allannguiniarnerit ataatsimoorfiginiarlugit neriorsoqatigiinnikuuvugut, imaassanngilarli ajortortai isigigaluarlugit aaqqiiniaratalu manngertitaarfigissagivut. Inatsisartuni partiit naalakkersuisooqatigiit partiillu allat peqatigalugit torersumik oqaloqatigiissutigisinnaassagipput, naalakkersuisut siulittaasuat Hans Enoksen oqarpoq.