Hans Enoksen: Aleqa pikkorippoq

Aningaasaqarnermut nunanullu allanut naalakkersuisussatut toqqaanini Hans Enoksen-ip tunngavilersorlugu oqarpoq, Aleqa Hammond tulluartorujussuusoq.

- Sulilluaqaaq, pkkorippoq aammalu nunanut allanut tunngasunik annertoorujussuarmik misilittagaqarluni. Aamma naalakkersuinermik massakkut misilittagaqalereerpoq piffissami sivikikkaluartumik. Taamaakkami aningaasanut nunanullu allanut naalakkersuisunngortinnissaa ajukkunnanngilluinnarpoq, Hans Enoksen oqarpoq.

Naalakkersuisoqarfimmulli allamut nuussammat ugguanngitsuunngilaa, isumaginninnermut tunngasut suliarisami, annertuutut pitsaasutut nammineq nalilikkani, ilai suli naammassineqanngitsut.

- Kisianni Naalakkersuisooqatigiit ataatsimut sulisussaagatta taanna ernumagivallaanngilara, naalakkkersuisut siulittasuat oqarpoq.

Aningaasaqarnermut naalakkersuisup suliassai amerlapput, naalakkkersuisut tamarmiusut suliaannik ataqatigiissaarisuusarami. Kisianni Hans Enoksen isumaqarpoq, Aleqa Hammond-ip suliassaq sapinngilluinnaqqissaaraa.

- Misilittagaqareerpoq. Naalakkersuinerup iluinnaaniunngitsoq nunani allani aamma inuiaqatigiit iluanni annertoorujussarmik suleqataasarnermigut.

2008-imi aningaasanut inatsisissaq naalakkersuisunut pingasunngorpat saqqummiunneqassaaq, naalakkersuisullu siulittasuata naatsorsuutigaa, kinguartoornani aggustip aallartilaarnerani tamanut saqqummiunneqassasoq.

- Suliarineqarnerani tamani naalakkersuisut malinnaaqqissaarmata ajornartorsiutaanavianngilaq - aamma Aleqa Hammond eqqarsaatigalugu, Hans Enoksen naggasiivoq.