Hans Enoksen: Akuliuttoqanngilaq

Nioqqutissat nunaqarfinniittut akiinut naalakkersuisut akuliunneq ajortut, naalakkersuisut siulittaasuata Hans Enoksenip radioaviisimut oqaatigaa. Ingerlatsiviup siulersuisuisa qullersaasalu kissaataat malinneqaannarput, Hans Enoksen oqarpoq.
Allattoq Mads Lynge
februaarip 13-at 2008 10:48

Naalakkersuisut tamatumunnga atatillugu kukkussutigisartakkatik KNI-mut tutsikkaat, Demokraatit sinnerlugit Inatsisartunut ilaasortap Jens B. Frederiksenip isornartorsiuinermini radioaviisimut ippassaq oqaatigaa. Hans Enoksen ima akivoq:

- Akuliunnerunngilaq. Ingerlatsiviup siulersuisui qullersaalu taamatut kissaateqarmata taamatut nalunaaruteqarpugut, tamannalu nalilersoqqinneqarnissaa nunaqarfiit peqatigiiffiata aamma kissaatigigaa paasinarpoq, Naalakkersuisut siulittaasuat Hans Enoksen oqarpoq, nangipporlu:

- Akit piviusut atuutsinneqassappata, taava pissakinnerusut allallu annertuumik eqqorneqassapput. Taamaammat kiffartuussinermut isumaqatigiissutip naleqqussarnissaa aammalu ulluinnarni inuunermut pisariaqartinneqarnerusunut atugassiissutigineqarnissaa naalakkersuisut piginnittut sinnerlugit tamanna oqariartuutigissamaarpaat, Hans Enoksen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq