Hans Enoksen aallaammik toqunneqarnissaanik sioorasaarneqartoq

Naalakkersuisut siulittaasuat Hans Enoksen angummit inuusuttumit aalakoortumit aallaallugu toqunneqarnissanik sioorasaarneqarpoq. Tamanna pivoq ualimut Nuummi Brugseneeqqap eqqaani naalakkersuisunut siulittaasoq ilisisunut naalagiareernerata kingorna.

Angut inuusuttoq inuiat arlallit tusaasut nillialluni naalakkersuisut siulittaasuat akerartorpaa sakiaatigullu tigusarlugu. Akerartuinermini aningaasaqarnermut naalakkersuisoq Per Berthelsen aamma aallaammik toqunniarlugu sioorasaarivoq. Naalakkersuinikkut sulininni akeqqersimaarneq naammattoortarpara kisiannili toqunneqarnissamik sioorasaarineq akuerisinnaanngilara, Hans Enoksen radioaviisimut oqarpoq. Naalakkersuisut inuttulli allatullu inuupput naalakkersuisunut ilaasortaaneq pissutigalugu toqumik sioorasaarineq akuerisinnaanngilara Hans Enoksen oqarpoq.

Hans Enoksen sioorasaarneqarnermini annilaangasimanngilaq angullu inuusuttoq toqutsinissamik sioorasaarisoq ilisarisinnaasimanngilaa, sioorasaarineratali nalaani arlalinnit tusarnaarneqarlunilu isiginnittoqarpoq.

Naalakkersuisut siulittaasuata aallammik toqunneqarnissaanik sioorasaarneqarnera pillugu Nuummi politiit oqaaseqartinniaraluarpugut taakkuali ulappipput sioorasaarinerlu pillugu oqaaseqarsinnaanatik.