Hans Egedep Illua ikuallaleraluartoq
Ikuallanneq Hans Egedep Illuata allissutaani aallartissimavoq. Kukkusoqarneratigut kissarsuutip uuliatortup pujoorfiata ikuallalerneratigut qalia ikuallalersimavoq. Qatserisartut takkutipallannerisigut inneq qaminneqarpoq. Annerusumik ajoqusiisoqannginnissaa anguniarlugu qatserisartut aamma isumannaallisaasimasut Sermitsiap nittartagaani allaaserineqarpoq.
Hans Egedep Illua Nunatsinni sanaartukkani pisoqaanerpaavoq, ullumikkullu Inatsisartut ilassinnittarfiattut atorneqarluni. Qalipakkat, eqqumiitsuliat pequtillu naleqaqisut illumi pigineqarput. Illulli ilassutaa kisimi ajoqusersimasoq oqaatigineqarpoq.
Hans Egedep Illua februaarip tungaanut matoqqagallassaaq, nutaamik uuliatortumik kiassaaserneqassagami, nutaamik pujoorfilerneqarluni, illullu allissutaa nutaamik pappialarsualerneqassammat.
