Hans Anthon Lynge: Oqaatsit aamma kulturiupput

Oqaatsinik nutserisarnini pillugu Hans Anthon Lynge sisamanngorpat nersornaatisissaaq, Danmarkimi Statens Kunstråds Litterattur udvalgi tunniussisuussalluni.

Hans Anthon Lyngep nersornaaserneqarnissani ima oqaatigaa:

- Tupaallanneq annerusumik. Aammalu eqqarsarpunga sooq uangaassava taama pineqartoq. Qanoq suliaqartigigama taama pineqarpunga. Immaqa taallami oqartarnerattuut: "Suliakka annikikkaluaqaat, kisianni annertuppulli ilaat", Hans Anthon Lynge taama oqarpoq.

Hans Anthon Lynge isumaqarpoq, kalaallit oqaasii navianartorsiunngitsut.

- Kalaallit oqaasii ajunngitsorsuupput. Atorluaraanni suli ukiuni inuuffigisatsinni ulorianartorsiornavianngillat.

Atuakkat nuannarisani Hans Anthon Lynge-p nutserniartarpai.

- Inuup inuuneranut tunngasut ilisarnartullu tamakku annerusumik tunngaviginiartarpakka. Soorlu inooqatigiinnermut pissutsit, inuit imminnut pissusilersoqatigiinnerat ilaalu ilanngullugit.

Oqaatsinik ilinniarusuttunut Hans Anthon Lynge siunersuuteqarpoq:

- Oqaatsinik tusarnaarneq, paasiniaaneq, imminut misilerarneq, atuarneq aammalu oqaatsip tunuani isummat qanoq isikkoqarnersut sungiusagassanut ilaavoq, Hans Anthon Lynge oqarpoq.

Hans Anthon Lyngep nersornaaserneqarnini 15.000 euro-nnassutigissavaa. Aningaasat ilaat atuakkanut pilerigisaminut atorniarpai.

- Atuakkat pisoqqat, arlallit pilerigisakka ujartussavakka. Pingaartumik 1700-jukkut kingorna saqqummersut, kalaallisut allagatoqqat atuagatoqqat tamakku amigaatikka ujassavakka, Hans Anthon Lynge oqarpoq.