Hangar oqallittarfiliaraat
![](/sites/default/files/styles/image_934x467/public/article_images/fly_630_2.jpg?itok=J3R5vJHk)
Air Greenlandip hangariani issiavilersuisoqarlunilu nerrivilersortoqassaaq marlunngorneq novembarip 22-iat, imarpik qulaallugu timmisartuussinnermi Nuummi mittarfissualiornissaq oqallisigineqalerpat.
Assartuussineq pillugu isumalioqatigiissitap inassutigaa Kangerlussuaq matullugu mittarfik Nuummut nuunneqassasoq. Inaarutaasumilli aalajangertoqartinnagu misissorneqartut ilagaat Nuup silaa.
Politikkikkut oqallinnerup unikkallarnera atorluarniarlugu Air Greenland innuttaasunik oqallitsitsiniarpoq timmisartuutileqatigiit facebook-imi ikinngutai aamma soqutiginnittut allat hangarimi oqallinnissamut qaaqquneqarmata.
- Atuisut atuisuungitsullu oqaloqatigisarnissaat uatsinnut pingaaruteqarpoq, suliffeqarfittullu apeqqutit oqaaseqaatillu soorlu facebook-ikkut quppernitsinni saqqummiunneqartartut iluaqutigalugillu nunannaarutigisarpagut. Tamakkulu inuit tikillugit ”qangatut” ataatsimiisitsinermik ilarusuppagut, pisortaaneq Michael Binzer nassuiaavoq.
Partiit angallanneq pillugu oqaaseqartartui aamma qaaqquneqarput taamatuttaaq angallannermut Naalakkersuisoq Jens B. Frederiksen oqalliseqataallunilu apeqqutinut akissuteqartarumaarluni.
Oqallinnermi pingaarnertut sammineqassaaq Nuup mittarfiata ineriartortinnissaa. Sermitsiap akisussaalluni aaqqissuisua Poul Krarup oqallinnermi aqutsisuussaaq.