Hamasikkut Israelimut raketilersornitik unitsippaat
Qaammatit arfineq-marluk matuma siornatigut Israel sorsuffereerlugu Gazallu ilarujussua aserortereerlugulu, maanna nunarsuarmiunut saaffiginninneq pineqalerpoq. Matumanili sakkunut pequtissat tassaanngillat rakettit, tassaallunili kulturi avammullu nittarsaanneq. Taamatut sammisaqalerneq taamaallaat Hamasimut tunngatinneqarsinnaanngilaq. Hamas allatut ajornartumik sammivimminik allanngortitsisariaqarlerpoq, rakettimmi palæstinamiut sakkutuujunngitsut isaannit isigalugit iluatsinngitsoorput, sakkutuujunngitsummi aserugarpassuit, Israelip akisilluni saassunneraninngaanneersut, naammagiinnartariaqarallarpaat.
- Rakettit taakkua sumut iluaqutaassagamik, inuit taama aperisarput, uniutoqaammi, soorlumi tassa ippernaq nagguaatsumut akiuuttoq. Hamasip maannakkut pisuni Israelimiut Gazamik qulangersimanninniarneranni isumaqatissarsiornerat annerpaamik iluaqutiginiarlugu misilinnialerpaa.
Maannakkut palæstinamiut tv-kkut nangeqattaartuliaat nunanit muslimeqarfiusunit assigiinngitsunit pissarsiarineqartut suliaralugit ilungersuutigineqarput, taamatullu aamma aningaasaqarnikkut ajornarsaarineq Israelip Gazamut aalajangiusimasaa pillugu nunarsuup sinneranut paasissutissiisoqarluni.
Hamasilli akerlianik aallakaatitassianik allattut aqunneqarsinnaannginnerat, aammalu nunarsuup assinga allatut ittoq namminneq avammut saqqummiussartik naammagiinnartariaqarpai, soorlu tv-kkut nangeqattaartuliassani isiginnaartitsisussat amerlanersaat arnanngortillugit.
Sakkulersorluni Israelimut akerliuniarneq suli pingaaruteqartoq Hamasimit oqaatigineqarpoq, aammali kulturikkut akerliuniarneq pingaartipparput.
Atassuteqarneq nutaaq erseqqilluinnartumik atuarneqarsinnaavoq, tassa juunimi rakettit Gazamiit taamaallaat marluk igeriunneqarput, ukiuni arfineq-marlunni aatsaat taama ikitsigalutik.
