Hamasikkut Israelimiullu akersuuttuarsinnarput

Palæstinamiut ingasattajaarniat sakkulersortut Hamasimeersut Israelimiullu akersuuteqqipput, illoqarfiilli iluanni akersuuttoqanngilaq. Illuatungeriit akersuuttuassappata aaqqiagiinngissutit qaangerniarlugit isumaqatigiinniarnissat ajornakusuussapput.
Allattoq Mads Lynge
januaarip 12-at 2009 17:12

Tuluit Nunaanni ministeriunerusimasoq Tony Blair, nunanit tamanit Kangiani Qiterlermut aallartitatut maanna inissisimasoq, Igitsinip præsidentia Hosni Mubarak Kairomi ataatsimeeqatigereerlugu oqarpoq sakkuaakkunnaarallarnissamut isumaqatigiissutissat piariilersut.

Palæstinamiut maannamut 900-nit amerlanerusut ullut 17-it kingulliit toqutaasimasut 3600-llu missaat ikilerneqarsimasut, Gazami napparsimmaveqarfiit nalunaarutigaat.

Gazamut ikiorsiinissaq pillugu nunat tamat ataatsimeersuartinneqarnissaanut piareersimanerarlutik, Tjekkiamiut maanna EU-mut siulittaasuusut nalunaarutigaat.

Tjekkiap nunanut allanut ministeria Karel Schwarzenberg oqarpoq Gazamut ikiorsiinissamut nunat assigiinngitsut piareersimasariaqartut.

- Gazamut ikiorsiinissaq pillugu ataatsimeersuartoqarnissaa, Gazallu sanaqqinneqarnissaanut alloriarnerit siulliit tiguneqartariaqartut, ministerip piumasaraa, nalunaarummi atuarneqarsinnaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq