Halloween Canadami politikkikkut eqqortumik atorneqassasoq

Ullumikkut halloweenip ulloraa.

Canadami halloweenertoqarnera ukioq manna politikkikkut eqqortumik atorneqartussaasoq, Montrealimit ilanngutassiortutta oqaluttuaraa.

Halloween tassaavoq amerikamiut iluartut ulluata pinnginnerani malunnartitsisarnerat.
Halloween amerikap avannaamiuisa mitaarfissiortarneraat, tassanilu meeqqat illumiit illumut kasuttoqattaarlutit sukkuaqqanik allanillu qinnuloorneratigut malunnartinneqartarpoq.

Halloweenimi inersimasut atisalersorlutik katerisimaarnikkut qittattuniinnikkut nuannattarput.
Nalliuttorsiorneq oktobarip ulluisa naggataanni nalliussineqartartoq mitaarfissiornerminngaanniit aarasaarnerullunilu ersinarnerusarpoq.

Meeqqat inersimasullumi mitaarutinik aarasaartunik saanikuliatullu atikkersortarput. Saanikut, kalunnerit savimerngit, aliortukkat, qitsuit qernertut allallu ersinartut aammali quianarsinnaasut atorneqartarput.

Inuit mitaartut supermanditut rockertartutulluunnit atikkersorsinnaasarput. Indianerisut eskimuutullu mitaaruteqarneq aamma nuannaartorineqartarsimavoq.

Eskimuutut atisat pakkarsuit naatsut, aammalu sikuusaq eskimois-imik taaneqartartoq atorneqartarput tassa kjoli naatsunnguaq qaqortoq ukallit amianik nasartalik mitaarnermi atorneqartarpoq.

Mitaarutilli taamaattut ukiuni kingullerni akerliuffigineqartarput allaallu akerliussutsimik takutitsisoqartarluni.

Atuarfiit peqatigiiffiillu maanna mitaarutinut malittarisassaqalerput. Pisiniarfiit eskimuujusaarutinik tuniniaaqqusaajunnaarput.

Kulturimmi assigiinngitsut illaruaatigineqaqqusaanngillat; maannalu ataqqineqassallutik.