Halibut Greenlandip Royal Greenlandip piginneqatigiissuteqalernera uparuaarpaa

-Aarleqqutigineqartariaqarpoq massakkut pisoq takusarput akuersaaginnarneqassaguni siunissami qanoq inissisimasoqalernissaa, kisermaassivissortutut inissisinnaavoq Royal Greenland, Halibut Greenlandimi pisortaq Niels Thomsen qisuariaateqarluni taama oqarpoq. Tamannalu Royal Greenlandip Qeqertaq Fishimi piginneqatigiissutinik 58 procentinik pisiaqarneranik tunngaveqarpoq.  Qeqertarsuup tunuani unammilleqatigiinnermut tamanna ullumi sunniuteqanngikkaluartoq Niels Thomsenip politikkerit suliffeqarfimmut Namminersorlutik Oqartussanit pigineqartumut ersarissumik isummersortariaqalersorai. Tassa Royal Greenland kisermaassileqqissappat aalisakkat akikilleqqissinnaammata.

-Aki tassani apparujussuassooq qangatullu immaqa inissinneqaqqilluni, taanna ornikkusunnanngittorujussuuvoq. Kisianni ullumikkut politikkerit soqutiginninngittutut tikkuinnartartillugit tassa taannaavoq killiffigisassarput, Niels Thomsen oqarpoq unalu politikkerinut isummersuutigeqquaa.

-Politikkerit isummersuutigisariaqarpaat, suliffeqarfik inuiaqatigiinnit pigineqartoq, inuiaqatigiit aningaasaataat tunuliaqutaralugit, suliffeqarfik namminersortoq, inuit nammineerlutik aningaasaliiffigalugu pilersissimasaat, taanna ipitinniarsinnaaneraat? Niels Thomsen oqarpoq. Ilulissani Aalisartut piniartullu peqatigiiffianni IAPPimi siulittaasup Erik Reimerip Halibut Greenlandimit uparuaaneq tapersersorlugu KNR-imut oqarpoq.