Halibut Greenland tunitsivigineqarluarpoq
Halibut Greenlandip Ilulissani qaleralinnut tunitsivia tallimanngornermi kingullermi ukiumik ataasinngortorsiorpoq.
Tunisassiulerneranit ukiup affaa siulleq ilungersunartorsiorfiusimavoq. Tassami siorna 1,5 million koruuninik amigartooruteqarluni ingerlasimammat.
Ukioq mannali januaarip aallaqqaataaniit aggustip allaaqqaataanut Qeqertarsuup Tunuani qalerallit 5100-it tonsit tulaanneqartut affangajalluinnaat, tassa 2400 tonsit, Halibut Greenlandip tunitsivianut Ilulissaniittumut tulaanneqarput:
- Ukiup affaata uuma, siorna tunisassiorneq amigartoorfiusoq, ingerlareernerani angusat kusanartorujussuupput. Aamma sinneqartoorfiulluni ingerlatsiviuvoq, Henrik Sandgreen, Halibut Greenlandimi pisortaagallartoq oqarpoq.
Qaleralinnut tunitsiviup namminersortup ammarneqarnerata kingorna, Ilulissani tunitsiviulersut marluk, tassa Royal Greenland aamma Halibut Greenland akitigut unammigaatsiarput. Tamannalu Halibut Greenlandimut ilungersunangaatsiarsimavoq.
Halibut Greenlandip Ilulissani tunitsivia ulloq unnuarlu paarlakaattunik 65-it missaannik sulisoqarpoq. Taakkua saniatigut qulit missaat usingiaasutut sulillutik.
Halibut Greenlandip Ilulissani tunitsivia inuinnarnit aalisartuniunerusunillu 70-it missaanniuttunit 65 procentimik pigineqarpoq, 35 procentii inuussutissarsiornermi aningaasaliisarnermik ingerlataqartumit Greenland Venturemit pigineqarlutik.