Halibut Greenland: Pisortat arsaq maanna paaraat
Halibut Greenland, aningaasaliisunit arlalinnit pilersinneqarnikoq, Upernaviup nunaqarfiani Aappilattumi, 159-inillu inulimmi, tunisassiorfimmik 30 million koruunit sinnerlugit akeqartussamik sananissaminut piareersimagaluarpoq.
Kisianni aqquserngit, talittarfik, inissiat meeraaqqerivillu Aappilattumi sanaartornissaminnut pisortanit piorsarneqassanersut maanna utaqqiinnalerpaat:
- Piviusunngortitsinissamut amigaataasutut isiginnaasara unaavoq fabrikkip avataani, kisianni fabrikkip ingerlasinnaaneranut pisariaqarluinnartut, pisortat qanoq piniarnerlugit isummerfiginiarneraat, Halibut Greenlandip pisortaa, Niels Thomsen, oqarpoq.
Fabrikkimi pissutsit assigiinngitsut iluarsineqanngippata tunisassiulersinnaanngilaq:
- Soorlu assersuutigilara imermut, innaallagissamut, aqqusinernut talittarfinnullu tunngasut. Tassa fabrikkip avataaniittut, kisianni fabrikkip ingerlasinnaaneranut pingaaruteqarluinnartut, taakkua isummerfigineqartinnagit alloriaqqissinnaanngikkallarpugut, Niels Thomsen oqarpoq.
Pilersaarutaavoq fabrikki 2016-ip naajartulernerani piareerpat ukiumut 30-t sulisorineqartassasut. Taamaammat Niels Thomsenip Aappilattumi inissianik sanaartortoqarnissaa aamma pisariaqarnerarpaa, fabrikkimmi sulisussat allaneersut aamma pisariaqartissammagit:
- Uagut fabrikkiliorniarpugut. Inissianik sanaartornianngilagut. Meeqqerivik pisariaqassappat, meeqqerivik sananianngilarput. Uagut meeqqerivilerisuunngilagut inissiaatileqatigiiffiunatalu. Uagut tunisassiorfiuvugut. Tassa aalisakkanik pisisassuugut, tunisassiortassuugut tunisarlugillu. Tassa suliarput, Niels Thomsen oqarpoq nangillunilu:
- Uagut fabrikki tamakkiisumik akilerumaarparput isumalluusersornata. Kisianni fabrikkip ingerlasinnaaneranut sinaakkutit pisortaninngaanniit isumagineqartariaqarput, Niels Thomsen oqarpoq.
Niels Thomsenip ernummatigaa Halibut Greenlanip Aappilattumi fabrikkiliorniarnerminut pilersaarumminik unitsitsiinnarsinnaanera fabrikkip avataani pisariaqartitat pisortanit iluarsineqanngippata.
