Halibut Greenland nutaamik pisortartaartussanngortoq
Niels Thomsen Halibut Greenlandimi pisortatut atorfimminit soraarniuteqarpoq. Inuttaa 2011-imi decembarimili pisortaavoq.
- Halibut Greenlandimi pisortatut periarfissinneqarsimanera assut qujassutigaara, suleqatigisimasakkalu tamaasa qujaffigalugit, Niels Thomsen oqarpoq.
Niels Thomsen Demkoraatini siulittaasuunikuuvoq. Inatsisartunut 2018-imi qinersinermi taaguunneqarluarpoq, stresserninili pissutigalu sulinngiffeqareerluni politikkimit siorna novembarimi tunuarpoq.
Halibut Greenland Ilulissani 2008-imi pilersinneqarpoq. Suliffeqarfik taanna Ilulissani aalisartunit - aalisartut qaleralittaannik saarullittaannillu maanna tunisassiortartoq - pilersinneqarpoq.
AAMMA ATUARUK Niels Thomsen politikkimit tunuarpoq
Halibut Greenlandimi siulersuisut siulittaasuata Mikael Nathanielsenip, Niels Thomsenip soraarniuteqarnera ajuusaarutigaa.
- Ugguaralugu paasivarput pisortarput soraarniuteqartoq. Niels Thomsen pisortaanermini pitsaasumik tunniusimallunilu suliuarsimavoq, Mikael Nathanielsen oqarpoq.
- Suliffeqarfiuterput nunatsinni suliffeqarfiit annersaannut pisortat suliffeqarfiutigisaannut unammillertuugami, ilaannilu sakkortuumik unammineqartarsimalluta, ukiuni ingerlasimasuni ilungersorfiginerpaasatsinni Niels Thomsenip isumannaatsumik ingerlatsisimanera annertuumik qujassutissaqarfigaarput. Maqaasissavarput Niels Thomsenip piginnaasani atorlugit, aamma inuttut qunusuilluni unammillerumatussuseqarlunilu pissuseqarnera.
Paarlatsissaanik pisortassarsiortoqalereerpoq.