Haitimi illoqarfiit pingaarnersaanni innuttaasut ilaquttaminnik qanigisaminnillu ujarlerrattut akornanni ajunaarsimasut timaat amerliartuinnartut nassaariortorneqarput. USA-p præsidentia attortissimaqisoq ima oqarpoq:
- Aseruatiternerit qanoq annertutiginerat aatsaat paasiartulerparput. Napparsimmaviit aseruatitersimaqisut assingi aamma angutit arnallu eqqaamiuminnik ujaasisut takullugit attortinnaqaaq, Obama tusagassiortunik katersortitsinermini oqarpoq.
Røde Korsip nalunaarutaa malillugu inuit 3 millionillit nunap sajunneranit eqqugaapput qassilli toqusimanersut suli amerlassusilerneqarsinnaanngillat. FN-ip allaffeqarfia aseruatitermat sulisut 100-it ajunaarsimassangatinneqarput FN-illu allaffeqarfiata pisortaa aamma ajunaarsimasorineqarpoq.
Illoqarfiit pingaarneraata ilarujussua aseruatitersimaqaaq, suli innaallagiaqalinngilaq oqarasuaatillu atorsinnaanatik. Mittarfiilli miffigineqarsinnaalerlutillu aallarfigineqarsinnaalerput ikiorsiinerlu taamaalilluni aallartissinnaalerluni.
Danmarkimeersut suliniaqatigiiffiillu nunarsuarmi assigiinngitsuneersut Haitimukaallutik aallartereerput soorluttaaq USA annertuumik ikiorsiiniarluni neriorsuisoq:
- Inunnik annaassiniarnissaq siunertaralugu pinasuartumik ikiorseeqqusivunga. Haitimi innuttaasut nerisassanik ikiorneqassapput aseqqukuniillu matoorussaaqqasut annaanniarneqarnerini aamma ikiorsiiumaarpugut, Obama oqarpoq.
Danmarkimi ineriartortitsinermut ministeri Ulla Tørnes Haitimut 10 millioni koruuninik ikiorsiissuteqarpoq.