Haitimi nakorsat peqqissaasullu pisariaqartinneqarput
Nappaatip kolerap tunillaassuunerata kingunerisaanik inuppassut toqorarput, tunillaassuunerup toqarartullu ingalassimaartinneqarnissaanut Haitimi nakorsanik peqqisaasunillu atorfissaqartitsisoqarpoq.
Nunat tamat suliniaqatigiiffianeersut maannakkut Haitimi sulisut, nakkutiginninnertik aqukkuminaatsippaat. Naalagaaffiit Peqatigiit ikiuniaqatigiiffiani atorfilik taamatut oqarpoq.
Januarip qaammataani Haitimi nunap sajunnerata kingorna, nappaammik toqussutaasinnaasumik koleramik tunillaassuuttoqarneratigut ikinnerpaamik nakorsat 100-inik amerlanerusut peqqissaasullu misilittagaqarluartut 1000-it missaannik amerlassusillit atorfissaqartinneqarput.
Haitimi innutaasut 1400-it sinneqartut koleramik napparsimallutik toqupput, ullullu tamaasa toqusut amerlisarlutik.
Valerie Amos, Naalaagaaffiit Peqatigiit ikiuiniaqatigiiffiani allaffimmi pisortap tullia oqarpoq, ikiuniarnermi aningaasat pisariaqartinneqartut aalajangiisuunngitsut, inuilli atorfissaqartinneqartut, tassalu nakorsat peqqissaasullu amerlanerit atorfissaqartinneqartut. Taakkua paasissutissiinermik suliaqarnermi ikiuuttussaasut Valerie Amos nutaarsiassaqartsivimmi Reuterimi issuarneqarpoq.
Haitimiut koleramik tunillatsinnissaminnut ulorianartorsiortut hundredetusintinik amerlassuseqarput, tunilaassuunneq ukiumik ataatsimik sivisussuseqarsinnaasoq oqaatigineqarluni.
Haitimi nunap sajunnerata kingorna aserortut sanaartorneqarnissaat aammalu inuit atugarisaasa pitsanngorsarneqarnisaat ajornakusuussasoq oqaatigineqarpoq.
