Haitimi aliasunneqarpoq
Inuit timaat toqungasut aqqusinerni maaniinnaq takussaapput. Annaassiniartut qasoqqaqisut qarmakuni unissanatik assaannarminnik ujaasipput. Nunap marlunngormat sajorujussuarnerata kingorna annassimasunik illukorpassuarni naammattuuinissaq nalunaaquttap akunneri tamaasa neriunaataarukkiartuinnarpoq. Nutaarsiassaqartitsivimmi Ritzauimi tamanna allaaserineqarpoq.
Port-au Princemi nuna akuttuttunngitsumik sajoqqeqatatarpoq, taamaaligaangallu annaassiniat uiverrallutik siammakaasarput.
Haitimi ministeriunerup, Jean-Max Bellerive-p, ernummatigaa inuit 100.000-ilippassuit ajunaarsimassasut.
Port-au-Princemi illukorpassuit piiarnissaannut atortussaaleqipput, aamma ikiuutissat assigiinngitsut amigaatigineqarlutik, naak ikiuiartortorpassuit Haitimut nunanit allaniit tikerareeraluartut.
Assersuutigalugu Island annaassiniartartunik ikiuisussanillu holdinik 37-nik Haitiliartitsiniarpoq. Taakku ilaatigut nassassavaat annaassiniutit ikiuinermullu atortussat tonsit qulit, soorlu attaveqaatinut atortussat imermullu minguiaatissat.
Islandimi nuna tamakkerlugu annaassiniartartut Tyrkiami Marokkomilu nunap sajuttarnerini ikiuuttarnermikkut misilittagaqarluartut, Reykjavikimi nunanut allanut ministereqarfimmit ilisimatitsissutigineqarpoq.
Norgimi Røde Kors ilisimatitsivoq tupermik nakorsiartarfeeqqatut atorneqarsinnaasumik nassitsinissaminnut piareersarlutik, Sverigimiillu oqarput, annaassiniartartunik piareersimatitsillutik, Naalagaaffiillu Peqatigiinnit qinnuigineqassagaluarunik Haitiliariaannaanerarput.
