H1N1 Danmarkimi tunillaassuuppoq
Danmarkimi H1N1-imik nappaalaneq sapaatip akunnerata naanerani tunillaassuuttutut malunniuppoq. Nappaatinut virusilinnut ilisimatooq Jens Lundgren Københavnip Universitetianeersoq, Danmarkip Radioanut taama oqarpoq.
Allattoq Elisa Isaksen
novembarip 09-at 2009 09:13
Taanna oqarpoq, H1N1-imik tunillanneqarsimasutut paasineqartut amerleriarujussuarsimasut.
Nakorsat nakorsiartarfimmeersut oqaatigaat, sapaatip akunnerata naanerani immikkut ittumik ulapputtoqarsimasoq.
Qassit nappaammik tunillanneqarsimanersut Jens Lundgren maanna oqaatigissallugu siusippallaarnerarpaa. Taamaattorli tunillaassuuttoqarnerata kinguneranik inuppassuit napparsimalersimanerat qularutissaanngitsoq, oqaatigalugu.
Peqqissumik inuugaanni tunillanneqarlunilu, taava nappaatip sunniutai qaangiussitserlugit angerlarsimaannarluni innanganissaq, allamillu iliuuseqannginnissaq Jens Lundgrenip aamma innersuussutigaa.
Nappaatimmi sunniutai ullut pingasut-sisamalluunniit qaangiukkaangata peeruttarput.
